Las missivas mussan co che las disposiziuns vertentas per reglar dumondas da la furmaziun sa cloman e tge consequenzas ch'ina midada da questas disposiziuns en il senn da las iniziativas avess. La regenza propona al cussegl grond da recumandar a las votantas ed als votants da refusar las iniziativas.

Il mars 2017 è vegnida inoltrada l'iniziativa dal pievel "Buna scola grischuna – cundecisiun en dumondas impurtantas da la furmaziun". Las votantas ed ils votants che han sutsegnà questa iniziativa pretendan che dus artitgels da la constituziun chantunala vegnian midads uschia che dumondas impurtantas e fundamentalas da la furmaziun stoppian vegnir regladas tras la lescha u tras in conclus dal cussegl grond ch'è suttamess al referendum facultativ. Il medem mument ha il medem comité d'iniziativa inoltrà l'iniziativa legislativa "Buna scola grischuna – cundecisiun tar ils plans d'instrucziun". Perquai vegni er discurrì d'ina iniziativa dubla. Las parts integralas da l'iniziativa legislativa furman oravant tut la regulaziun dals cuntegns dals plans d'instrucziun, l'approvaziun dals plans d'instrucziun tras il cussegl grond, il referendum facultativ cunter la decisiun d'approvaziun dal cussegl grond sco er ina disposiziun transitorica che regla tranter auter co che plans d'instrucziun gia concludids u relaschads ston vegnir tractads.

Proposta da refusar las iniziativas
La regenza propona da refusar las duas iniziativas dal pievel, perquai ch'in relasch respectivamain in'approvaziun dals plans d'instrucziun tras il cussegl grond na correspunda betg al sistem e n'è betg confurm al stgalim. L'elavuraziun ed il metter en vigur d'in nov plan d'instrucziun daventassan uschia bler pli cumplitgads. Plans d'instrucziun cuntegnan disposiziuns executivas tecnicas cumplexas e na fan betg part dal champ da cumpetenza dal cussegl grond u dal pievel. Cun l'introducziun dal Plan d'instrucziun 21 GR, cunter la quala sa drizza centralmain l'iniziativa dal pievel, vegnan ils cuntegns da la furmaziun en il senn da l'art. 62 da la constituziun federala coordinads ed armonisads commensuradamain. Las regulaziuns vertentas garanteschan ch'ils plans d'instrucziun possian vegnir elavurads vinavant da bleras spezialistas e da blers spezialists e relaschads da l'organ executiv responsabel. Ina midada da l'urden da cumpetenza vertent fiss colliada cun dischavantatgs gravants e cun gronds custs.

Il cussegl grond vegn a tractar la missiva en la sessiun d'avust 2018.


Agiunta:
missiva


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail Martin.Jaeger@ekud.gr.ch
- Andrea Stadler, secretaria dal departament d'educaziun, cultura e protecziun da l'ambient, tel. 081 257 27 11, e-mail Andrea.Stadler@ekud.gr.ch


Gremi: regenza
Funtauna: rg chanzlia chantunala