La regenza ha prendì posiziun davart midadas che la confederaziun ha planisà en la lescha federala davart il servetsch civil. Plinavant ha ella approvà ina nova senda da colliaziun a Flem e garantì ina contribuziun chantunala a l'exposiziun professiunala "Fiutscher".
La regenza propona mesiras per mantegnair ils effectivs da l'armada
La regenza ha prendì posiziun tar in project da consultaziun dal departament federal d'economia, furmaziun e retschertga (DEFR) che prevesa midadas en la lescha federala davart il servetsch civil. Il project vul far frunt a trais facturs che pericliteschan ils effectivs da l'armada. D'ina vart al grond dumber d'admissiuns en il servetsch civil che crescha ad in crescher. Da l'autra vart al grond dumber d'appartegnentas e d'appartegnents da l'armada che midan da furmaziuns da l'armada al servetsch civil suenter avair absolvì cun success la scola da recrut. Plinavant identifitgescha il project in privel tras la midada da spezialistas e spezialists sco er da caders da l'armada al servetsch civil.
Da princip sustegna la regenza grischuna la finamira dal cussegl federal. Ella constatescha dentant che las mesiras proponidas n'èn betg cunvegnentas. La regenza dubitescha ch'ellas reduceschian considerablamain las admissiuns al servetsch civil e l'attractivitad dal servetsch civil. Per quest motiv propona la regenza ulteriuras mesiras. Per exempel duai la dumonda d'admissiun al servetsch civil pudair vegnir fatga mo tranter la recrutaziun ed avant la scola da recrut. Ultra da quai na duain las persunas ch'èn obligadas da far servetsch militar, che vegnan clamadas ad in servetsch d'assistenza u ad in servetsch activ, betg pli pudair far ina dumonda d'admissiun al servetsch civil. Plinavant propona la regenza d'abolir la pussaivladad da pudair absolver il servetsch civil a l'exteriur.
Documents da consultaziun DEFR
Nova senda da colliaziun a Flem
La regenza ha approvà il trassé per ina senda da colliaziun nova ed attractiva ch'è planisada tranter Unterwaldhaus ed il quartier Waldhaus. Il trassè aveva la vischnanca da Flem determinà gia daditg en la planisaziun locala. Cun questa senda vegnan la via la Hoia e la via Uaul Pign colliadas ina cun l'autra per ils peduns. A medem temp ha la regenza concedì la permissiun da runcar necessaria e refusà differentas protestas da proprietaris cunfinants cunter la runcada. Avant che la senda po vegnir construida sto la vischnanca da Flem anc realisar definitivamain la procedura per la permissiun da construcziun sco er procurar per ils dretgs da passadi necessaris a favur da la generalitad.
©Comet Photoshopping ScRL / Dieter Enz
L'exposiziun professiunala "Fiutscher" ha lieu gia per la tschintgavla giada
L'uniun grischuna d'artisanadi e mastergn organisescha dals 14 fin ils 18 da november 2018 gia per la 5. giada l'exposiziun professiunala "Fiutscher". Er quest onn ha l'exposiziun che dura 5 dis lieu en la halla da la citad da Cuira. Grazia a la cooperaziun da quasi tut las exposituras e tut ils expositurs resta la purschida da las professiuns e da las furmaziuns supplementaras preschentadas stabila. L'exposiziun professiunala mussa passa 300 professiuns, furmaziuns supplementaras ed autras purschidas.
Ultra da las preschentaziuns da las differentas professiuns ha l'uniun grischuna d'artisanadi e mastergn elavurà ensemen cun il post da stab per l'egualitad da las schanzas e l'uffizi per la furmaziun professiunala ulteriuras purschidas per promover e per sustegnair giuvenils tar la tscherna da professiun. D'ina vart survegnan ils giuvenils là infurmaziuns davart la tscherna da professiun averta ed atipica per las schlattainas. Da l'autra vart permetta la purschida supplementara visitas guidadas per persunas da lingua estra per reducir las difficultads da las persunas che derivan da famiglias immigradas da s'infurmar davart la furmaziun e davart las professiuns.
La regenza garantescha maximalmain 250 000 francs vi dals custs totals da l'exposiziun dad 841 000 francs. Ultra da quai sa participescha la confederaziun cun 206 078 francs vi da l'exposiziun "Fiutscher" 2018. Ils custs restants vegnan finanziads dals expositurs, dals sponsurs e da l'uniun grischuna d'artisanadi e mastergn.
©Uniun grischuna d'artisanadi e mastergn
Gremi: regenza
Funtauna: rg chanzlia chantunala dal Grischun