L'alcohol sco droga la pli populara vala er en il Grischun sco ina da las ristgas las pli grondas per la sanadad. Perquai entran las organisaziuns grischunas per la prevenziun e cussegliaziun da dependenza sco er las organisaziuns per la terapia cunter la dependenza en contact cun la populaziun dals 20 fin ils 25 da matg 2019. La "Emna da dialog grischuna davart l'alcohol" cumpiglia in pachet da mesiras multifaras che duai infurmar e sensibilisar la publicitad.

Ils studis actuals èn surprendents: Radund 250 000 persunas en Svizra èn dependentas d'alcohol (Panorama da dependenza 2019, Dependenzas Svizra). E mintga tschintgavla persuna consumescha "ristgadamain" alcohol. Per umens sauns èn quai dapli che dus magiels normals, per dunnas dapli che in per di. In magiel normal correspunda a 3 dl biera, ad 1 dl vin u a 3 cl vinars. Las consequenzas d'in consum sproporziunà èn grevas. Ellas cumpiglian donns da sanadad, donns socials e donns economics. Sut la devisa "Viva? Lain discurrer da quai" tschertgan l'uffizi da sanadad dal Grischun, ils servetschs psichiatrics dal Grischun, la Crusch blaua dal Grischun ed ils servetschs socials regiunals dal Grischun il discurs cun la populaziun. L'emna da dialog grischuna davart l'alcohol ha lieu dals 20 fin ils 25 da matg 2019.

Acziuns previsas en il Grischun
Durant questa emna è il team da la campagna sin viadi tras il Grischun e tschertga il discurs cun la populaziun sin via. Er sin viadi è la blue cocktail bar, nua ch'i vegnan maschadadas bavrondas gratuitas senza alcohol. Ina schelta da manaschis da gastronomia offreschan ultra da quai durant questa emna en lur restaurant in aperitiv spezial senza alcohol. Sco punct culminant da l'emna ha lieu ils 23 da matg en la Postremise a Cuira ina saira da teater publica, gratuita. Il toc da teater interactiv "Viva!" dal teater Knotenpunkt tracta il tema difficil dals problems d'alcohol or d'ina autra perspectiva ed envida a sa participar. En las salas da spetga da medias e medis, da psicologas e psicologs, da spiritualas e spirituals, da clinicas ed en apotecas vegnan plinavant a star a disposiziun carnets d'infurmaziun davart la campagna. Tut las infurmaziuns davart l'emna da dialog, davart il program sco er davart posts da consultaziun chattan ins online sut www.bischfit.ch/d/dialogwoche.

Part da l'emna da dialog naziunala davart l'alcohol
L'emna da dialog grischuna davart l'alcohol fa part da l'emna da dialog naziunala davart l'alcohol che ha lieu dals 16 fin ils 26 da matg. Organisaziuns da la cussegliaziun per dumondas da dependenza e prevenziun, da la cultura, dal sport u da la furmaziun èn preschentas durant l'emna da dialog quasi en tut la Svizra: sin plazzas publicas, a staziuns, en instituziuns per persunas attempadas, en teaters, en interpresas ed en scolas.
Dapli infurmaziuns: www.fachverbandsucht.ch, www.alcohol-facts.ch  

Agiunta:
Flyer da la campagna "Viva? Lain discurrer da quai."


Infurmaziuns:
Denise Rudin, uffizi da sanadad, manadra da la partiziun "promoziun da la sanadad e prevenziun", vicemanadra dal program grischun cunter l'alcohol, tel. 081 257 64 02 u 078 746 42 20, e-mail Denise.Rudin@san.gr.ch


Gremi: uffizi da sanadad
Funtauna: rg uffizi da sanadad