Ensemen cun represchentantas e represchentants da l'agricultura e da l'ambient lantscha l'uffizi d'agricultura e da geoinfurmaziun il project "Agricultura grischuna neutrala al clima". Suenter ch'ils scleriments preliminars necessaris da l'onn 2020 èn avant maun, duai vegnir realisà ils onns 2021 fin 2024 in project da pilot cun intgins manaschis agriculs. L'extensiun sin tut l'agricultura grischuna è planisada a partir da l'onn 2025.

La reducziun da las emissiuns da gas cun effect da serra ed ina protecziun efficazia dal clima tutgan tar las sfidas las pli grondas e las pli impurtantas dals proxims onns. L'agricultura chaschuna 13 pertschient da las emissiuns da gas cun effect da serra en Svizra. Correspundentamain duai ella er sa participar activamain a mesiras da protecziun dal clima. Tenor la strategia federala da clima "Agricultura" duain las emissiuns en la producziun vegnir reducidas fin l'onn 2050 per in terz ed en l'alimentaziun tut en tut per dus terzs (cumpareglià cun l'onn 1990). Questas finamiras, ed il fatg che la populaziun è pli conscienta dal clima, signifitgan er ina schanza per l'agricultura, en spezial per l'agricultura grischuna cun ses vasts territoris da muntogna e cun sias alps extendidas sco er cun passa 60 pertschient manaschis biologics.

Victualias producidas schanegiond il clima
Cun il project "Agricultura grischuna neutrala al clima" duai d'ina vart vegnir instradada la midada ad in'agricultura che schanegia il clima e che producescha damain gas cun effect da serra. Da l'autra vart èsi dentant er la finamira da procurar cun basas e cun mesiras concretas ch'ils manaschis agriculs grischuns hajan in avantatg da concurrenza. Grazia ad in avantatg da savida e da realisaziun als pussibilitescha il project da sa posiziunar a temp e cun success sin il martgà cun victualias d'auta qualitad, producidas schanegiond il clima.

Realisaziun dal project
Per cuntanscher las finamiras vegnan fatgs ils onns 2019 e 2020 scleriments preliminars detagliads sco er valitaziuns da mesiras e da lur effects. Integrads en las lavurs èn differents uffizis, persunas spezialisadas, las branschas sco er persunas da la pratica. Ils onns 2021 fin 2024 duain vegnir sviluppadas e realisadas – en il rom d'in project da pilot cun in dumber limità da manaschis agriculs – mesiras per ina meglra effizienza da las resursas, per damain emissiuns sco er per la cumpensaziun da gas cun effect da serra. En quest connex duai er esser pussaivel da sbassar ils custs da gestiun e da meglierar la valurisaziun. Sin fundament dal project da pilot duain las mesiras vegnir extendidas a partir da l'onn 2025 sin tut l'agricultura grischuna.


Infurmaziuns:
Daniel Buschauer, manader da l'uffizi d'agricultura e da geoinfurmaziun, tel. 081 257 24 31, e-mail Daniel.Buschauer@alg.gr.ch


Funtauna: rg uffizi d'agricultura e da geoinfurmaziun
Gremi: uffizi d'agricultura e da geoinfurmaziun