L'Archiv dal stadi dal Grischun (Uffizi da cultura) sa legra da preschentar la publicaziun la pli nova en la retscha "Funtaunas e perscrutaziuns davart l'istorgia dal Grischun" (FIG). Durant passa 150 onns ha il project d'ina "viafier orientala da las Alps" stimulà la fantasia planisatorica da bleras Grischunas e da blers Grischuns e cutizzà lur ambiziuns en la politica da traffic. Tge è capità dapi lura, tge è restà?

Gia baud suenter l'arrivada da la viafier è daventada actuala la "dumonda da la viafier da las Alps": Tgenina è la lingia da transit ideala tras la Svizra? Davart questa dumonda hai dà dispitas stinadas tranter differentas regiuns e gruppas d'interess. Dals numerus projects èn vegnidas realisadas durant il 19avel tschientaner mo la viafier dal Gottard ed il cumenzament dal 20avel tschientaner la lingia Lötschberg-Simplon. Ina regiun dal pajais ha percunter adina tratg la curta tar tut las planisaziuns: la Svizra orientala – particularmain il chantun Grischun che ha pers per gronda part ses traffic tradiziunal sur ils pass.

La retrospectiva sin las debattas vehementas tranter ils aderents dals differents projects da viafier dat a medem temp ina nova vista sin la construcziun da la Viafier retica.

Ina preschentaziun publica dal cudesch cun referats ha lieu pli tard.

Fotografia agiuntada:

Caricatura da l'onn 1853 or da la revista satirica Der Postheiri: Il Lucmagn ed il Gottard cumbattan in cunter l'auter per il decurs da la lingia da la viafier svizra da las Alps. A sanestra ils Grischuns, a dretga ils aderents da la viafier dal Gottard.

Agiunta:
mappa per las medias cun infurmaziuns detagliadas

Infurmaziuns:
- Reto Weiss, archivari dal stadi, tel. +41 81 257 28 01, e-mail Reto.Weiss@sag.gr.ch
- Luzi C. Schutz, autur, tel. +41 79 790 61 64, e-mail Luzi.Schutz@gmail.com

Gremi: Uffizi da cultura / Archiv dal stadi
Funtauna: rg Uffizi da cultura / Archiv dal stadi