La Cumissiun per politica da stadi e strategia dal Cussegl grond (CPSS) ha cumenzà a predeliberar la missiva tar la "Adattaziun dal sistem electoral dal Cussegl grond". Ella è entrada unanimamain sin il project ed ha returnà la missiva a la Regenza per la cumplettar.
Sut il presidi dal president da la cumissiun Maurizio Michael ha la CPSS cumenzà a lavurar vid la predeliberaziun da la missiva da la Regenza tar la "Adattaziun dal sistem electoral dal Cussegl grond". A questa sesida èn stads preschents er il president da la Regenza Christian Rathgeb e represchentants da la Chanzlia chantunala. La missiva al Cussegl grond s'occupa dal model E, in sistem maschadà da maiorz e da proporz en – da nov – 42 circuls. En la consultaziun aveva quest sistem survegnì la pli gronda accoglientscha. La CPSS è entrada unanimamain sin il project. Per l'elecziun dal Cussegl grond 2022 dovra il chantun Grischun in nov sistem electoral.
Returnà la missiva per la cumplettar cun il model C
La cumissiun è unanimamain da l'avis ch'ina vasta elavuraziun da la problematica concernent il sistem electoral possia mo reussir, sch'i vegn er mussà ad ella, co ch'i pudess vegnir concepì il model C, in dretg d'elecziun da proporz en ils 39 circuls existents. En la consultaziun aveva er quest model chattà in ferm sustegn. Per quest motiv ha la CPSS fatg valair ses dretg da returnar ina missiva a la Regenza per la repassar. La Regenza è pia incumbensada da cumplettar cun il model C la missiva ch'exista gia per il model E.
La fatschenta vegn tractada en la sessiun da favrer 2021
Pervia dal return a la Regenza na po la fatschenta betg vegnir tractada sco previs en la sessiun da december 2020. Perquai ch'i vegn a duvrar in tschert temp per cumplettar la missiva sco pretendì, po la CPSS tractar detagliadamain il project pir il december 2020. L'urari per la votaziun dal pievel dal zercladur 2021 na vegn betg periclità tras quai.
Infurmaziuns:
president da la cumissiun Maurizio Michael, tel. +41 79 798 90 92
Gremi: Cumissiun per politica da stadi e strategia
Funtauna: rg Cumissiun per politica da stadi e strategia