A la retschertga da cas da COVID-19 en la scola da Panaduz èn vegnids testads la gievgia avantmezdi 100 giuvenils dal stgalim superiur Panaduz/Razén sco er 50 persunas d'instrucziun da la scola da Panaduz. Ina persuna testada è stada positiva.

Suenter ch'igl aveva dà in'accumulaziun d'infecziuns da COVID-19 sin il stgalim superiur Panaduz/Razén, malgrà ch'ins aveva fatg durant 10 dis instrucziun a distanza, ha l'Uffizi da sanadad decidì – ensemen cun la scola e cun il Stab directiv communal – da far ina retschertga da cas. Ils tests han pudì vegnir realisads en collavuraziun cun la media da scola dr. Elisabeth Pommé.

Las persunas che han gì pli stretg contact cun la persuna cun il test positiv èn vegnidas eruidas ed infurmadas immediatamain. Il Stab directiv communal è stà cuntent ch'il dumber da persunas infectadas era uschè pitschen. Grazia al fatg che las persunas d'instrucziun sco er las scolaras ed ils scolars èn stads fitg pronts da laschar far ils tests, han ins pudì excluder in dumber pli grond da persunas asintomaticas.

Ins po anc adina s'annunziar per ils tests gratuits
L'Uffizi da sanadad spera che questa gronda prontezza da sa laschar testar saja er avant maun tar la populaziun dal Grischun dal sid. Igl è vinavant pussaivel da s'annunziar per ils tests territorials en las regiuns Bernina, Engiadina Bassa/Val Müstair e Malögia. Fin oz en damaun eran s'inscrittas gia passa 9500 persunas per in termin. Ils tests durant la fin d'emna èn gratuits e voluntars. S'annunziar pon ins er al lieu. Per evitar fullas da glieud vegni recumandà da s'annunziar online sut il link www.gr.ch/corona-test.

L'Uffizi da sanadad renda attent ch'ils tests èn in med impurtant per identifitgar sche pussaivel tut las infecziuns cun il nov coronavirus. Er suenter ils tests territorials en il Grischun dal Sid duai la populaziun grischuna perquai sa laschar testar – er en cas da sintoms levs da COVID-19 – tar las medias ed ils medis da chasa, en ils ospitals u en ils centers da test nord e sid. En quest cas paja la Confederaziun ils custs dal test.

Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)

Gremi: Uffizi da sanadad
Funtauna: rg Uffizi da sanadad