L'Agid a victimas dal Grischun ha cusseglià l'onn 2019 var 763 victimas da violenza e persunas pertutgadas da mesiras repressivas per motivs da provediment. Dapi l'onn 2015 è il dumber da cussegliaziuns creschì per 40 pertschient.
Cun 763 cussegliaziuns currentas l'onn 2019 ha l'Agid a victimas dal Grischun cuntanschì in nov maximum. Il dumber da novs cas da cussegliaziun è restà constant ils ultims onns. La durada da las cussegliaziuns è percunter s'augmentada: l'onn 2015 eran 50 pertschient da las cussegliaziuns terminadas entaifer 1 onn, l'onn 2019 èn quai mo 34 pertschient.
Grafik 1: Svilup dal dumber da cas, 2015 fin 2019
Da las 763 cussegliaziuns currentas eran 137 persunas pertutgadas da mesiras repressivas per motivs da provediment. 626 persunas han chattà agid tar il Post da cussegliaziun per l'agid a victimas, perquai ch'ellas eran pertutgadas da violenza – stgars 47 pertschient da quellas da violenza a chasa (295 persunas).
Grafik 2: Dumber da cussegliaziuns da l'Agid a victimas GR 2019
Cussegliaziuns per l'agid a victimas
Al Post da cussegliaziun per l'agid a victimas pon sa drizzar persunas ch'èn vegnidas violadas en lur integritad corporala, sexuala u psichica. I n'emporta betg, cura che quest abus ha gì lieu – per part è quai stà avant blers decennis. Er n'èsi betg necessari d'avair inoltrà ina denunzia penala per vegnir cusseglià da l'Agid a victimas. Il Post da cussegliaziun per l'agid a victimas mussa numnadamain a las persunas pertutgadas lur dretgs e lur pussaivladads ed intermediescha, sche necessari, ulteriurs agids.
Da las 626 persunas pertutgadas da violenza ch'èn vegnidas cussegliadas l'onn 2019, han 59 pertschient subì in act da violenza u ina blessura corporala, 35 pertschient èn stads pertutgads d'extorsiun, da smanatscha u da constricziun. 11 pertschient èn vegnids blessads en il traffic sin via. 38 pertschient han subì violenza sexuala, quai correspunda a 236 persunas, 111 da quellas èn vegnidas violadas en lur integritad sexuala en la vegliadetgna d'uffant. 295 (47%) da las victimas èn stadas pertutgadas da violenza a chasa tras lur partenari (59%) respectivamain tras lur partenaria (6%) u tras in auter commember da la famiglia (35%). En 19 cas da violenza a chasa ha stuì vegnir intermedià l'onn 2019 temporarmain in alloschi da protecziun u d'urgenza.
Grafik 3: Malfatgs da las cussegliaziuns currentas 2019
Mesiras repressivas per motivs da provediment
137 persunas pertutgadas da mesiras repressivas per motivs da provediment èn vegnidas sustegnidas da l'Agid a victimas tar la tschertga d'actas, e quai en collavuraziun cun l'Archiv dal stadi dal Grischun. Ellas han er survegnì agid per inoltrar a la Confederaziun la dumonda per ina contribuziun da solidaritad. A la gronda part da las persunas petentas è la contribuziun da solidaritad vegnida pajada ora la fin da l'onn 2019.
Il Cussegl naziunal ed il Cussegl dals chantuns han deliberà ils 19 da zercladur 2020 ina midada da la lescha. Las persunas pertutgadas pon da nov inoltrar ina dumonda per ina contribuziun da solidaritad per vita duranta. Il Post da cussegliaziun per l'agid a victimas sustegna las persunas tar l'inoltraziun da la dumonda.
Infurmaziuns:
Susanna Gadient, manadra da l'Uffizi dal servetsch social, tel. +41 81 257 26 51, e-mail Susanna.Gadient@soa.gr.ch
Gremi: Uffizi dal servetsch social
Funtauna: rg Uffizi dal servetsch social