A partir da mardi, ils 12 da schaner 2021 pon per entant persunas sur 75 onns sco er persunas creschidas cun malsognas cronicas sa preannunziar per in termin da vaccinaziun en il chantun Grischun. Pervia da la disponibladad limitada dal vaccin ston las persunas sut 75 onns anc avair in pèr paucas emnas pazienza.
Perquai ch'il vaccin è disponibel mo limitadamain, vegnan vaccinadas tenor las recumandaziuns da la Cumissiun federala per vaccinaziuns exclusivamain las persunas da tschertas gruppas en mira. Per entant èn quai las persunas sur 75 onns sco er las persunas creschidas cun grevas malsognas cronicas. Tar questas malsognas cronicas quintan tschertas furmas da:
• insuffizienza dal cor ed angina pectoris
• ipertonia arteriala resistenta a terapias
• grevas malsognas da la via respiratorica
• greva insuffizienza cronica dals gnirunchels
• diabetes mellitus cun organs donnegiads u diabetes mellitus na reglà bain
• adipositas (davent d'in BMI ≥35 kg/m²)
• defizienza dal sistem d'immunitad innata u acquistada sco er terapia immunosuppressiva (p.ex. tschertas malsognas da cancer sut terapia activa, greva infecziun da HIV, transplantaziun d'organs)
Tgi che n'appartegna betg a l'emprima gruppa en mira, sto anc avair pazienza in pèr emnas. Vaccinaziuns da gronda dimensiun dependan primarmain da la disponibladad dal vaccin e pon vegnir fatgas probablamain l'avrigl.
A persunas che han fatg tras la malsogna da COVID-19 (test positiv) vegni recumandà da sa laschar vaccinar pir 3 mais suenter la guariziun.
Persunas cun in'allergia sin parts dal vaccin (en spezial sin polietilenglicols, PEG) sco er dunnas en speranza na duessan betg sa laschar vaccinar.
Vaccinar en las regiuns
Tut tenor la disponibladad dal vaccin vegnan vaccinadas las gruppas en mira menziunadas, suenter ch'ellas èn vegnidas registradas, a partir da la fin da schaner en ils ospitals regiunals da Tavau, da Glion, da Puschlav, da Schiers, da Scuol e da Tusaun sco er en ils centers a Cama, a Cuira (Ospital da la Crusch) ed a San Murezzan. Las cussegliaziuns da vaccinaziun tutgan al champ da cumpetenza da las medias e dals medis da chasa. Ellas ed els vegnan a porscher pli tard er vaccinaziuns en lur praticas, sch'il vaccin correspundent è disponibel.
Annunzia per las emprimas gruppas en mira
Las persunas sur 75 onns sco er las persunas creschidas che han las grevas malsognas cronicas menziunadas qua survart pon sa preannunziar per la vaccinaziun a partir dals 12 da schaner 2021, davent da las 10.00. Quai po vegnir fatg online (www.gr.ch/impfung) u per telefon sur la hotline da vaccinaziun. Per la vaccinaziun pon sa registrar mo las duas gruppas previsas actualmain. Ils termins da vaccinaziun vegnan attribuids dals centers da vaccinaziun suenter la registraziun; i n'è betg pussaivel da tscherner libramain in termin. Per la preannunzia online dovran ins la carta da l'assicuranza da malsauns sco er il numer dal telefonin.
Ulteriuras infurmaziuns davart la vaccinaziun cunter il coronavirus vegnan publitgadas d'in cuntin sin la pagina d'internet www.gr.ch/impfung.
Infurmaziuns:
KPost da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)
Gremi: Uffizi da sanadad
Funtauna: rg Uffizi da sanada