En il rom d'ina concurrenza tschertga la Cuminanza da lavur da las regiuns alpinas (ARGE ALP) soluziuns digitalas innovativas per augmentar la forza da resistenza da las regiuns da muntogna durant e suenter la crisa da corona. Annunzias pon vegnir inoltradas fin il 1. da mars 2021.
Cun il premi 2021 vul la ARGE ALP undrar soluziuns digitalas en connex cun la crisa da corona. La crisa da sanadad che regna en l'Europa e sin l'entir mund ha grondas consequenzas per la societad e per l'economia en mintga pajais, en mintga chantun ed en mintga regiun. Fin ch'ina nova normalitad po s'etablir, èsi bun da drizzar l'attenziun sin ils novs basegns e sin ils basegns midads pertutgant la sanadad, la segirezza e la connectivitad e da reponderar en general il mintgadi sco er las relaziuns e las activitads.
Pli svelt or da la crisa grazia ad innovaziuns digitalas
En vista a quests fatgs publitgescha la ARGE ALP – sut il presidi da la regiun Lumbardia – il premi da la ARGE ALP 2021 per soluziuns digitalas innovativas: interprendidras ed interprendiders giuvens u fundaturas e fundaturs giuvens d'interpresas pitschnas e mesaunas èn envidads da sviluppar products e servetschs che servan ad in nov cumenzament suenter la pandemia.
Tschertgadas vegnan innovaziuns digitalas che accelereschan la via or da la crisa e che gidan a meglierar nossa forza da resistenza economica sco communitad. Las soluziuns innovativas ston esser vegnidas sviluppadas aposta sco resposta a novas pretensiuns ed a novs basegns ch'èn resultads pervia da la pandemia, ed ellas ston purtar in niz a la regiun alpina cun promover il progress economic e social da tala. Ultra da quai sto il product u il servetsch digital tractar in dals suandants temas: cultura, turissem, furmaziun, ambient, protecziun da la cuntrada e da la natira, agricultura ed economia forestala, energia e traffic, economia e cumpetitivitad da la regiun alpina.
Valitond las propostas vegn la giuria a dar la preferenza a soluziuns en secturs che han patì il pli fitg pervia da la crisa da corona e che concernan in grond dumber da burgaisas e burgais, en spezial la furmaziun e la scolaziun en scola ed en la professiun, u ils secturs interpresas, turissem e cultura.
Concurrenza per inventadras ed inventaders giuvens sut 35 onns
Sa participar a la concurrenza pon inventadras ed inventaders giuvens che han main che 35 onns ed èn domiciliads en in dals stadis commembers da la ARGE ALP il mument ch'ellas ed els s'annunzian. Las soluziuns preschentadas na dastgan betg gia esser patentadas u vegnir duvradas commerzialmain.
Premiadas vegnan las trais meglras propostas per soluziuns innovativas. Per la meglra proposta vegnan pajads 10 000 euros, las soluziuns sin il segund e sin il terz rang survegnan mintgamai 5000 euros. Il premi è da chapir sco impuls e sco contribuziun als custs per annunziar ina patenta europeica.
La selecziun vegn fatga en dus pass: En mintgin dals 10 stadis commembers da la ARGE ALP eruescha ina giuria regiunala ils megliers projects. Or da quests finalists elegia ina giuria internaziunala lura las victuras ed ils victurs principals. Ils premis vegnan surdads ils 2 da fanadur 2021 en il rom da la conferenza dals schefs da las regenzas en la Lumbardia.
Inoltraziuns grischunas
Ils projects dal chantun Grischun pon vegnir tramess fin il 1. da mars 2021 a l'adressa dad e-mail mediendienst@gr.ch.
Las modalitads per l'annunzia, il formular da participaziun sco er ulteriuras infurmaziuns stattan a disposiziun sin www.argealp.org.
Commembers da la ARGE ALP èn il stadi liber Baviera (Germania), ils stadis federativs Tirol, Salzburg e Vorarlberg (Austria), las provinzas autonomas Bulsaun-Tirol dal sid e Trento sco er la regiun Lumbardia (Italia) ed ils chantuns Grischun, Son Gagl e Tessin (Svizra).
Infurmaziuns:
Tamara Freuler, incumbensada per l'infurmaziun dal chantun Grischun, tel. +41 81 257 22 28, e-mail Tamara.Freuler@staka.gr.ch
Gremi: Cuminanza da lavur da las regiuns alpinas (ARGE ALP)
Funtauna: rg Cuminanza da lavur da las regiuns alpinas (ARGE ALP)