En il rom dals tests posteriurs da l'emna passada ad Arosa èn vegnidas testadas 1379 persunas sin il coronavirus. 98 pertschient dals tests èn stads negativs. Tar 29 persunas è il coronavirus vegnì confermà, en 19 cas è quai stada la varianta mutada. La rata da resultats positivs è regressiva cumpareglià cun l'emna precedenta. Questa rata po vegnir attribuida en emprima lingia als conturns da scola.

La mesemna passada è puspè vegnì fatg in test dal coronavirus en la scola d'Arosa. Da 90 emprovas èn 5 stadas positivas – tuttas cun la mutaziun dal virus (B.1.1.7). Cumpareglià cun l'emna precendenta ha la rata da positivitad pudì vegnir reducida cleramain grazia al management d'erupziun consequent.

La gievgia ed il venderdi è ultra da quai vegnì fatg in ulteriur test da massa per las abitantas ed ils abitants sco er per ils giasts ad Arosa. Ulteriuras 1289 emprovas èn vegnidas prendidas. Da quellas han 24 gì in resultat positiv areguard il coronavirus – tar 14 cas è vegnida cumprovada la mutaziun dal virus (B.1.1.7). Mo ina da questas persunas pertutgada n'ha da far nagut cun ils conturns da scola. Tut las persunas cun in test positiv n'avevan nagins sintoms da malsogna e na savevan perquai er betg ch'ellas pudessan infectar autras persunas. Grazia a l'agir svelt da l'Uffizi da sanadad sa chattavan las persunas dals conturns da scola gia en quarantina, e quai pervia dals tests ch'eran vegnids fatgs l'emna precedenta.

La scola ad Arosa è puspè averta
Ils tests posteriurs èn vegnids fatgs sco mesira da segirezza, suenter ch'igl era sa mussada en la scola d'Arosa in'accumulaziun d'infecziuns ils 26 da schaner 2021. Sin quai ha l'Uffizi da sanadad decretà immediatamain mesiras per proteger la populaziun ed ils giasts ed analisà l'erupziun en la scola. Ultra da quai è vegnì fatg in test da massa per tut la populaziun. Da 2794 provas èn da quel temp vegnidas confermadas 76 sco positivas (da quellas 63 sco mutaziuns).

Suenter che las mesiras immediatas han puspè pudì vegnir abolidas il 1. da favrer 2021, è a partir dad oz glindesdi, ils 8 da favrer 2021, er la scola d'Arosa puspè averta.

Observar vinavant las reglas da distanza e d'igiena
Grazia a la strategia da test activa han las accumulaziuns da cas en la scola pudì vegnir scuvridas baud e las persunas pertutgadas han pudì vegnir isoladas immediatamain. Ils tests ch'èn vegnids fatgs sin quai tar la populaziun han mussà che l'infecziun en la scola n'ha – grazia a l'agir svelt e consequent – betg pudì sa derasar decisivamain sur ils conturns da scola ora. L'Uffizi da sanadad engrazia a las famiglias pertutgadas per lur pazienza e per la buna observaziun da las mesiras, a la populaziun ed als giasts per la gronda participaziun al test da massa sco er al Stab directiv communal per la buna collavuraziun.

Anc adina vegni regurdà da renunziar vinavant a tut ils contacts betg necessaris cun autras persunas e d'observar consequentamain las reglas vertents da distanza e d'igiena. Per proteger ils conturns persunals vegni recumandà urgentamain da far in test dal coronavirus er en cas da sintoms mo levs.

Infurmaziuns: 
Post da communicaziun per il coronavirus dal chantun Grischun, e‑mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)

Funtauna: Uffizi da sanadad