La Regenza ha prendì enconuschientscha dal fatg che las premissas per tegnair avert ils territoris da skis èn vinavant ademplidas. Correspundentamain ha ella concedì la permissiun da tegnair avert ils territoris da skis fin la fin da la stagiun. La strategia efficazia cun pliras pitgas per cumbatter cunter la pandemia ha sustegnì la decisiun.

La Regenza ha prolungà la permissiun da tegnair avert ils territoris da skis fin la fin da la stagiun. Sustegnì questa decisiun han il vast concept da test sco er il giudicament da la situaziun epidemiologica. Il chantun Grischun persequitescha dapi il december ina strategia consequenta cun pliras pitgas per cumbatter cunter la pandemia. L'evaluaziun da las datas dals tests da massa da pilot ha mussà che la pandemia po vegnir franada cun agid da tests da massa regulars. Quests tests da massa pon remplazzar mesiras restrictivas.

Las cifras van en la dretga direcziun
Tant il dumber da persunas en isolaziun sco er il dumber da novas infecziuns per di en la media emnila èn sa diminuids vinavant. Er la valur da reproducziun decisiva è sa reducida vinavant. Las experientschas dals ultims mais mussan ch'ils territoris da skis averts n'han naginas consequenzas negativas sin questas cifras. Ils giasts sa repartan bain sin las differentas purschidas. Uschia pon vegnir evitadas gruppaziuns da glieud che augmentan la ristga d'infecziun. Er ils territoris da skis han ademplì lur incumbensas e gidà ad evitar per gronda part fullas da giasts.

La Regenza giuditgescha cuntinuadamain il svilup da las premissas epidemiologicas. En cas che la situaziun sa midass, pudess la permissiun vegnir retratga dals manaschis da sport d'enviern, sche las premissas na fissan betg pli ademplidas.

Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)

Gremi: Regenza
Funtauna: rg Chanzlia chantunala