La Regenza ha prendì enconuschientscha dal nov plan directiv d'energia dals 23 da settember 2020 da la vischnanca da Landquart. En la planisaziun communala d'energia analisescha la vischnanca ses provediment d'energia e profita da las libertads da decider per optimar l'utilisaziun da chalur persa producida al lieu sco er d'energias regenerablas. La planisaziun directiva d'energia attribuescha las prioritads dal provediment da chalur als singuls territoris e formulescha mesiras da realisaziun che vegnan sustegnidas da la vischnanca. Uschia vegnan stgaffidas las premissas per duvrar optimalmain la chalur persa existenta e las energias regenerablas. Duplicitads nunnecessarias en connex cun il provediment cun energias che basegnan in conduct vegnan impedidas tras quai.

Cun la planisaziun directiva d'energia persequitescha la vischnanca plinavant finamiras concretas da la politica d'energia. Fin l'onn 2050 duai il provediment d'energia en il territori communal – inclusiv l'electricitad, la chalur, il fraid, la mobilitad communala e l'energia processuala – vegnir cuvrì per 100 pertschient tras energias regenerablas. Ultra da quai prenda la vischnanca en mira da reducir entaifer il medem spazi da temp il basegn d'energia per abitanta u abitant sin 2000 watts da la prestaziun permanenta. Per cuvrir l'entir basegn d'energia fin l'onn 2050 na duain plinavant vegnir emess pli nagins gas cun effect da serra.

Gia l'onn 2009 ha la vischnanca da Landquart concludì l'emprim plan directiv d'energia en il chantun Grischun. Dapi lura è sa midà bler en la politica dal clima, en il provediment d'energia da Landquart ed en la tecnologia. En il nov plan directiv d'energia 2020 da la vischnanca da Landquart vegn reagì sin questa situaziun midada e mess la basa per in provediment d'energia regenerabla e postfossila.

Per sustegnair il Departament da giustia, segirezza e sanadad (DGSS) ha la Regenza nominà ina cumissiun per realisar il punct central da svilup "Turissem da sanadad" dal program da la Regenza 2021 fin 2024. La finamira è quella da qualifitgar ils furniturs da prestaziuns da sviluppar purschidas empermettentas en il turissem da sanadad.

Sin fundament da las enconuschientschas fatgas l'onn passà, pari dad esser pli cunvegnent da nominar ina cumissiun empè d'in think tank sco previs oriundamain. Questa cumissiun duai preschentar la strategia e las libertads d'agir pussaivlas als partenaris regiunals. Ultra da quai duai la cumissiun avair – en enclegientscha cun il DGSS – la pussaivladad da consultar persunas spezialisadas externas en singuls puncts per elavurar sistematicamain e per duvrar las enconuschientschas necessarias per sviluppar vinavant il turissem da sanadad. Questa structura è pli flexibla e permetta da reagir svelt, sche las cundiziuns generalas sa midan.

Program da la Regenza 2021 fin 2024