Il Cussegl grond e la Regenza vulan rinforzar la posiziun dal chantun sco patrun attractiv, per ch'el na perdia betg vinavant terren en la concurrenza per bun persunal qualifitgà. Per pudair recrutar e pudair tegnair en spezial las persunas spezialisadas ed ils caders necessaris duain las cundiziuns d'engaschament e da lavur da la Lescha dal persunal vegnir adattadas a las pretensiuns d'ozendi.

Sut la finamira politica surordinada "Administraziun moderna e concisa" respectivamain sut il punct central da svilup "Patrun attractiv" dal program da la Regenza 2021–2024 han il Cussegl grond e la Regenza fixà la finamira ch'il chantun porschia a sias collavuraturas ed a ses collavuraturs cundiziuns d'engaschament e da lavur progressivas cun prestaziuns da salari, prestaziuns socialas e prestaziuns accessoricas al salari cumpetitivas. La raschun è quella ch'il chantun ha dapi onns pli e pli gronds problems da recrutar las persunas spezialisadas ed ils caders ch'èn necessaris per in'administraziun chantunala moderna, effizienta e concisa.  

Revisiun parziala da la Lescha dal persunal
En il rom da la revisiun parziala da la Lescha dal persunal èn previsas meglieraziuns cunzunt en il sectur da la cumpatibilitad da la professiun cun la famiglia, da las vacanzas, da la flexibilisaziun dal pensiunament sco er da la promoziun da la lavur a temp parzial. Ulteriurs elements da la revisiun parziala da la Lescha dal persunal concernan avischinaziuns al dretg da lavur privat e l'extensiun da las cumpetenzas dals posts da servetsch.

La consultaziun dura fin ils 22 da zercladur 2021. Ils documents pon vegnir consultads sin la pagina d'internet dal chantun Grischun.

Infurmaziuns: 
- cusseglier guvernativ dr. Christian Rathgeb, schef dal Departament da finanzas e vischnancas, tel. +41 81 257 32 01, e‑mail Christian.Rathgeb@dfg.gr.ch
- Fernando Guntern, manader da l'Uffizi da persunal, tel. +41 81 257 32 24, e‑mail Fernando.Guntern@pa.gr.ch

Gremi: Chanzlia chantunala
Funtauna: rg Uffizi da persunal