Suenter Pasca cumenza la stagiun da construcziun 2021 sin e per lung da las vias chantunalas. L'emprim vegnan fatgas las lavurs da signalisaziun e messas las barrieras tranter las surfatschas da traffic ed ils plazzals. Uschia vegnan protegidas las participantas ed ils participants dal traffic e las persunas che lavuran sin ils plazzals. Ils dis suandants cumenzan las lavurs da construcziun e da cuvrida per propi.

Durant l'onn 2021 èn planisads var 200 plazzals sin la rait da vias chantunalas cun sia lunghezza da 1360 kilometers e cun sias circa 1500 construcziuns artifizialas, 78 da quests plazzals èn sin vias principalas e 102 sin vias da colliaziun. 91 plazzals vegnan reglads cun amplas da traffic mobilas. L'Uffizi da construcziun bassa s'engascha a favur d'ina circulaziun dal traffic optimala durant il temp da construcziun.

Pertge avain nus tants plazzals sin nossa rait da vias?
Er las vias chantunalas daventan veglias u na correspundan betg pli a las pretensiuns che sa midan permanentamain. La renovaziun ed il mantegniment architectonic garanteschan che nus en il chantun Grischun possedain ina rait da vias chantunalas che funcziuna e che correspunda al basegn da la societad. La durada da vita dals singuls elements importa tranter circa 25 onns per las cuvridas e passa 80 onns per ils elements purtants da las construcziuns artifizialas. Sch'ins considerescha in interval d'intervenziun mesaun da circa 30 onns ed ina lunghezza dal plazzal cundiziunada dal traffic da circa 300 meters, resultan var 180 plazzals per onn.

Il Fegl d'infurmaziun da l'Uffizi da construcziun bassa dal Grischun dat infurmaziuns detagliadas davart la stagiun da construcziun 2021. La charta e la glista da plazzals actuala cun indicaziuns detagliadas davart las lavurs e davart ils impediments po vegnir consultada sin www.strassen.gr.ch. L'Uffizi da construcziun bassa dat gronda impurtanza a la circulaziun dal traffic durant la fasa da construcziun. El supplitgescha las participantas ed ils participants dal traffic da prender resguard ed engrazia per lur chapientscha per eventuals temps da spetga durant lavurs da construcziun.

Infurmaziuns:
- Reto Knuchel, inschigner chantunal, Uffizi da construcziun bassa, tel. +41 81 257 37 01, e‑mail Reto.Knuchel@tba.gr.ch
- Nadja Wielath, responsabla per las medias, Uffizi da construcziun bassa, tel. +41 81 257 37 03, e‑mail Nadja.Wielath@tba.gr.ch

Gremi: Uffizi da construcziun bassa
Funtauna: rg Uffizi da construcziun bassa