La correcziun voluminusa da la via tranter Cuira e Domat vegn cuntinuada cun in ulteriur project. Durant ils ultims onns è gia il traject tranter Cuira e Favugn vegnì schlargià e cumplettà cun vials da velo laterals. Plinavant è la via vegnida fatga segira cun remplazzar il spartavias per Favugn tras ina rundella. Ussa duai il traject cunfinant davent da la rundella Favugn fin a la rundella Plarenga a Domat survegnir il medem standard da construcziun.

La Regenza ha approvà il project d'exposiziun per sanar il traject d'ina lunghezza da circa 1,2 kilometers. Tras quai ch'il vial ha da nov ina nova ladezza da 6 meters, po il traffic pesant cruschar senza privel. E grazia al fatg che la via survegn da tuttas duas varts vials da velo, vegn messa a disposiziun al traffic da velo ina colliaziun cuntinuanta directa. Ultra da quai vegnan la nischa da fermada dal bus tar la rundella Favugn (en direcziun da Domat) sco er il passape transfurmads e schlargiads tenor ils basegns da las persunas cun impediments. L'entir project è budgetà cun circa 8 milliuns francs.

A la Corporaziun da vischnancas Ovra electrica Cuira-Sand (GKC) a Cuira ha la Regenza ordinà da sanar l'aua restanta sco quai ch'igl è prescrit tras lescha. Per quest intent ha la Regenza approvà in proceder en etappas. En in'emprima etappa vegn la GKC obligada da prender ord funcziun las tschiffadas d'aua dals auals da Castiel e da Calfreisen. Davent dal rempar Lüen ston plinavant vegnir restituidas, en l'emprima fasa, quantitads d'aua da dotaziun graduadas tenor mais. Per la dotaziun davent dal rempar Lüen sto la GKC inoltrar ina dumonda correspundenta per l'approvaziun dal project. Cun las sanaziuns prescrittas dal dretg da la protecziun da las auas vegni tegni quint dals interess da las auas currentas e dals spazis da viver che dependan dad ellas.

 

©Corporaziun da vischnancas Ovra electrica Cuira-Sand

En il rom dal concept per implants da sport d'impurtanza chantunala (CISIC) ha la Regenza concedì a la vischnanca da Landquart ina contribuziun chantunala da totalmain 1,25 milliuns francs per il project "Renovaziun dal stabiliment d'atletica leva Ried" a Landquart. Tut en tut custa il project circa 6,5 milliuns francs.

En il rom dal CISIC promova il chantun la construcziun e la renovaziun da stabiliments da sport d'impurtanza naziunala, chantunala e regiunala. Il stabiliment da sport Ried è dapi il settember 2006 ina part integrala dal catalog dal CISIC ed ademplescha vinavant ils criteris correspundents.

©Vischnanca da Landquart

En il rom da la Nova politica regiunala da la Confederaziun (NPR) ha la Regenza concedì a la Pradaschier SA Top in emprest federal da 440 000 francs ed ina contribuziun chantunala da var 74 000 francs per construir ina zipline a Churwalden.

La zipline è ina suga tirolaisa ch'è stendida tranter la staziun da muntogna e la staziun da val da la sutgera Churwalden-Pradaschier. Cun il project da construcziun ha la Pradaschier SA la finamira da cumplettar la purschida turistica existenta da Pradaschier sco muntogna d'aventuras.

©Martello Teleferiche

La Regenza ha approvà la revisiun parziala da la planisaziun locala che la vischnanca da Mesauc aveva concludì ils 23 da settember 2018. Qua tras vegn tranter auter stgaffida la basa en la planisaziun dal territori per realisar in resort turistic en il territori "Acuforta" a San Bernardin. Il resort duai cumpigliar in hotel sco er abitaziuns da vacanzas explotadas en furma d'hotel cun tut en tut almain 400 letgs, ina recepziun ed in sectur da wellness. Per in auter project d'alloschament en il territori "Frach", ch'è planisà sin la plazza da parcar actuala da la staziun da val da las telefericas, ha la procedura d'approvaziun stuì vegnir sistida ad interim, fin che ulteriurs scleriments èn avant maun.

©Comet Photoshopping GmbH, Dieter Enz

La Regenza ha approvà ina cunvegna da prestaziun tranter il chantun Grischun ed il Parc naziunal svizzer per ils onns 2021 fin 2025. En questa cunvegna vegn fixada per l'emprima giada ina contribuziun chantunala per realisar projects respectivs en il Parc naziunal. Ils custs totals dals 17 projects importan var 5,7 milliuns francs per tut ils 5 onns.

Il chantun sa participescha cun ina contribuziun da 440 000 francs per onn u cun totalmain 2,2 milliuns francs per l'entira perioda. L'autezza da la contribuziun chantunala correspunda a l'autezza da la contribuziun ch'il chantun paja er als parcs natirals regiunals existents. Plinavant sa participeschan la Confederaziun cun 2,7 milliuns francs e las vischnancas cun 750 000 francs als custs totals.

La Regenza ha garantì a la vischnanca da Scuol ina contribuziun chantunala da maximalmain 420 000 francs per restaurar la "Punt Gronda" da Gurlaina. En connex cun questa contribuziun vegn la punt messa da qua envi sut protecziun chantunala da monuments.

La punt da Gurlaina è vegnida construida l'onn 1905 ed è la punt d'atschal la pli imposanta dal temp da fluriziun dal turissem da bogns curt suenter l'onn 1900. Ella è in object da protecziun communal e figurescha en l'Inventari federal da las vias da communicaziun istoricas (IVS) sco object d'impurtanza regiunala. Dapi l'onn 1980 è la "Punt Gronda" serrada per il traffic motorisà, furma dentant vinavant in liom impurtant entaifer la vischnanca da Scuol. Las lavurs da revisiun previsas cumpiglian la renovaziun da la surstructura, la cuntrafrancada da las balustradas ch'èn per part luccas sco er la renovaziun da la protecziun cunter corrusiun. Ils custs totals dal project da restauraziun importan circa 3 milliuns francs.

Foto 2, Foto 3, Foto 4

Per il 1. da zercladur 2021 integrescha il chantun Grischun las vias communalas "Via da Li Pradeli" e la "Via dal Mot da la Val" (vischnanca da Poschiavo) en la rait da vias chantunalas e surpiglia questas duas vias sco proprietad e per il mantegniment. Quai pervia da las relaziuns stretgas a Prada, ch'èn problematicas per il traffic da transit. Il traffic pesant nizzegia gia oz las duas vias communalas "Via da Li Pradeli" e "Via dal Mot da la Val" sco ruta per guntgir la via stretga e nunsurvesaivla tras Prada. Vitiers vegn ch'i na fiss betg pussaivel da schlargiar la via en il center da Prada al profil traversal da standard per vias chantunalas da colliaziun (4,2 meters) senza donnegiar u demolir singuls edifizis. In tal schlargiament vegn dentant ad esser necessari a vista mesauna.

Percunter surpiglia la vischnanca da Poschiavo in toc da la via chantunala da colliaziun da Pagnoncini sco proprietad e per il mantegniment. Il barat da vias pussibilitescha da sviar il center dal vitg da Prada.

©Uffizi federal da topografia

La Regenza ha prendì enconuschientscha da la petiziun che sa drizza cunter il nov access da la via da Sagogn a la via sursilvana, che duai manar sur Plaun Larisch e Plaun Pigniel. La brev è vegnida suttascritta da 1406 persunas e surdada ils 19 da schaner 2021 al president da la Regenza. Las petiziunarias ed ils petiziunaris pretendan ina lingia optimada confurm al trassé da la "Via Fletg". La necessitad d'in nov trassé na vegn betg contestada. Ma la via planisada – che avess ina ladezza da 7 meters e che manass tras la cuntrada natirala e culturala Plaun Larisch e Plaun Pigniel – vegn refusada, perquai che la biodiversitad vegniss periclitada. Tenor la petiziun vegniss il maletg da la cuntrada da Sagogn destruì uschia per adina.

La Regenza è conscienta da l'impurtanza d'ina cuntrada culturala e natirala intacta. Ma er la qualitad da viver da las abitantas e dals abitants stat a cor a la Regenza. Correspundentamain vegn l'Uffizi da construcziun bassa ad examinar la varianta cun il nov trassé. Silsuenter vegn il resultat discutà cun represchentantas e represchentants da la vischnanca politica da Sagogn, ed i vegn fixà l'ulteriur proceder.