Per motivs da segirezza e pervia da lavurs da nettegiada dal grip è la via dal Lucmagn, curt avant il pass, serrada ad interim per tut il traffic.
La dumengia suentermezdi, ils 13 da zercladur 2021, hai dà ina crudada da crappa curt avant il pass, tar il spartavias per il mir da fermada. Il lieu da distatga è var 10 meters sur la via. In toc grip da 150 meters cubic è glischnà sur la plattamorta stippa giu sin la via ed ha sutterrà l'entira via sin ina lunghezza da 10 meters. En il sectur sur il lieu da distatga sa chattan anc adina plattas da grip en moviment ch'èn sa distatgadas e che smanatschan da crudar giu.
Mesiras da segirada
La dumengia è vegnì fatg in emprim giudicament. Quel ha confermà che approximativamain passa 1000 meters cubic material da grip èn anc activamain en moviment en il sectur da distatga. Quest material smanatscha da crudar giu e sto perquai vegnir allontanà avant che la via po vegnir averta.
Temps da serrada
Las lavurs da nettegiada duran plirs dis. Actualmain n'èsi anc betg cler, cur che la via po vegnir averta. Per motivs da segirezza è la via dal Lucmagn serrada per tut il traffic, er per pedunas e peduns sco er per ciclistas e ciclists. Persunas che viandeschan e persunas che van cun velo da muntogna pon sviar sur las sendas da viandar u sur la via veglia. Sut www.strassen.gr.ch stattan a disposiziun la charta e la glista da plazzals actuala cun indicaziuns detagliadas davart las lavurs e davart ils impediments.
Fotografia agiuntada:
Foto 1: Circa 150 meters cubic material da grip è crudà sin la via dal Lucmagn.
Foto 2: Il lieu da distatga cun il toc grip ch'è en moviment.
Infurmaziuns:
- Eugen Duff, schef dal district Glion, Uffizi da construcziun bassa, tel. +41 81 257 68 80, e‑mail Eugen.Duff@tba.gr.ch
- Dumeng Schreich, manader da project Geologia, Uffizi da construcziun bass, tel. +41 81 257 38 30, e‑mail Dumeng.Schreich@tba.gr.ch
Gremi: Uffizi da construcziun bassa
Funtauna: rg Chanzlia chantunala