Tenor l'Ordinaziun chantunala da scola è il dumber da lecziuns per mez di sin il stgalim primar limità per regla a quatter lecziuns. Resguardond ils basegns pedagogics pussibilitescha la Regenza a las instituziuns responsablas per la scola d'augmentar quest dumber da nov a tschintg lecziuns en cas motivads. En quest connex han ils basegns dals uffants prioritad envers ils avantatgs organisatorics e finanzials.
La Regenza ha revedì l'Ordinaziun chantunala da scola. Cun quai è ella suandada in giavisch politic che las instituziuns responsablas per la scola possian augmentar en cas d'in basegn motivà il dumber da lecziuns per mez di sin il stgalim primar da normalmain quatter a da nov maximalmain tschintg lecziuns.
L'examinaziun sto vegnir fatga cun quità
La Regenza è conscienta dal fatg ch'ina extensiun dal dumber da lecziuns per mez di per motivs pedagogics sto vegnir ponderada fitg bain en cas da scolaras e scolars pli giuvens. Per ritmisar il decurs da l'onn, dal mais, dal di e da las lecziuns vegni fatg attenziun en il sectur da scola d'ina relaziun equilibrada tranter fasas d'activitad e fasas calmantas, tranter acziun e reacziun, tranter si e giu, tranter recepziun e sadulaziun per sustegnair il process d'emprender. Gist en la fasa da svilup tempriva da l'uffant è questa midada armonica ina premissas per mantegnair la prontezza interna per l'emprender. Per regla na duain pervia da quai betg vegnir surpassadas quatter lecziuns instrucziun per mez di. Tuttina datti cas motivads, nua ch'ina extensiun da la regla sto vegnir ponderada. Quai è per exempel il cas, sch'i èn avant maun stretgas spezialas da l'urari dal traffic public, sch'ils transports da las scolaras e dals scolars na pon strusch vegnir organisads autramain u sche las uras marginalas chaschunan custs da tgira pli auts. En cas excepziunalas sa laschan singulas lecziuns integrar meglier ed en moda pli armonica en in mez di per ina part da las scolaras e dals scolars, per stgaffir uschia dapli spazis libers durant in auter mez di.
L'uffant stat en il center
Perquai ch'ils uraris vegnan controllads da l'Uffizi per la scola populara ed il sport mintgamai avant il cumenzament da l'onn da scola, sa laschi eruir en il dialog, sch'ina extensiun da las lecziuns d'instrucziun per mez di, ch'ina instituziun responsabla per la scola ha planisà, è raschunaivla ed utila u betg. Tar tut las ponderaziuns e decisiuns en chaussa stat il bainstar da l'uffant adina sur ina soluziun puramain administrativa pli simpla u finanzialmain pli favuraivla. Uschia sa tracti er qua la fin finala d'ina consideraziun armonica e d'ina soluziun da cumpromiss en il senn da la scola e da sias acturas e ses acturs.
Infurmaziuns:
cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e-mail Jondomenic.Parolini@ekud.gr.ch
Responsabladad: Departament d'educaziun, cultura e protecziun da l'ambient