Il chantun pussibilitescha a las organisaturas ed als organisaturs d'occurrenzas grondas en il Grischun dapli segirezza da planisaziun. Per quai metta el a disposiziun ina protecziun finanziala chantunala per occurrenzas publicas. Profitar da quai pon occurrenzas d'impurtanza surchantunala cun dapli che 1000 persunas per di che ston vegnir annulladas pervia da la situaziun epidemiologica.
La Regenza ha deliberà l'Ordinaziun executiva chantunala davart las mesiras concernent las occurrenzas publicas d'impurtanza surchantunala en connex cun l'epidemia da COVID-19 (COVID-19-OEOP). La COVID-19-OEOP sa basa sin l'Ordinaziun COVID-19 eveniments.
Occurrenzas d'impurtanza surchantunala cun dapli che 1000 persunas
Occurrenzas publicas accessiblas a la publicitad en il Grischun, ch'èn concepidas per in public cun dapli che 1000 persunas per di e lur realisaziun è planisada tranter il 1. d'avust 2021 ed ils 30 d'avrigl 2022, pon inoltrar ina dumonda tar il chantun per garantir la participaziun als custs betg cuvrids (protecziun finanziala). La premissa per garantir la protecziun finanziala è ina permissiun da la polizia da sanadad chantunala per realisar l'occurrenza gronda. Medemamain sto l'occurrenza publica avair ina impurtanza surchantunala, quai vul dir ella sto sa drizzar ad in circul da persunas che surpassa il chantun.
Sco occurrenzas publicas en il senn da questa ordinaziun valan occurrenzas da sport e da cultura u exposiziuns spezialisadas e fieras publicas. Il chantun po sustegnair interpresas organisantas cun sedia en il Grischun u cun sedia en in auter chantun per occurrenzas publicas che duain vegnir realisadas en il Grischun.
Surpigliada dals custs betg cuvrids tras la Confederaziun e tras il chantun
La prestaziun da sustegn per occurrenzas grondas permessas, che ston vegnir annulladas, spustadas u manadas tras en moda reducida pervia da la situaziun epidemiologica, vegn calculada tenor ils custs betg cuvrids. L'interpresa organisanta ha ina franschisa da 5000 francs sco er ina resalva persunala da 10 pertschient dals custs betg cuvrids. Ils custs vegnan repartids tranter la Confederaziun ed il chantun.
Inoltraziun da la dumonda
Interpresas organisantas ston inoltrar la dumonda per garantir la protecziun finanziala per occurrenza avant sia realisaziun planisada tenor las prescripziuns chantunalas. La garanzia vegn concedida ensemen cun la permissiun da la polizia da sanadad per realisar l'occurrenza. Las infurmaziuns sco er ils formulars ed ils termins prescrits per inoltrar las dumondas stattan a disposiziun sin la pagina d'internet dal chantun.
Infurmaziuns:
cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01, e-mail Marcus.Caduff@dvs.gr.ch
Cumpetenza: Departament d'economia publica e fatgs socials