Dals 25 da november fin ils 10 da december 2021 metta il Grischun in signal cunter la violenza a chasa. Ils dis d'acziun da quest onn mettan il focus sin il tema «violenza sexuala». Il chantun po sustegnair finanzialmain organisaziuns participantas che organiseschan in'occurrenza u in'acziun.

La violenza a chasa ha bleras fassettas e n'enconuscha nagins cunfins, ni en reguard geografic e cultural ni areguard ils conturns socials, las furmas e la dimensiun. Cumpigliadas èn tut las acziuns da violenza corporala, sexuala, psichica u economica che vegnan avant entaifer la famiglia u la chasada ubain tranter conjugalas resp. conjugals u partenarias respectivamain partenaris anteriurs u actuals.

La «violenza sexuala» en il focus dals dis d'acziun 2021
Cun ils dis d'acziun dals 25 da november fin ils 10 da december 2021 renda il chantun attent – cuminaivlamain cun differentas organisaziuns – a questa furma da violenza. In'attenziun speziala drizzan ils dis d'acziun quest onn al tema central «violenza sexuala». Il Post da coordinaziun Violenza a chasa coordinescha ils dis d'acziun ed edescha in fegl sgulant cun il program da tut las occurrenzas ed acziuns.

Il chantun po sustegnair finanzialmain occurrenzas ed acziuns concernent il tema da la violenza a chasa en general sco er concernent il tema central «violenza sexuala» che han lieu durant ils dis d'acziun en il Grischun. Annunzias e dumondas correspundentas ston vegnir inoltradas fin ils 31 d'avust 2021. Tut las ulteriuras infurmaziuns en chaussa èn consultablas sin la pagina d'internet dal Post da coordinaziun.

Agiuntas:

formular d'annunzia per in'occurrenza 
formular da dumonda per sustegn finanzial per organisar e per manar tras in'occurrenza u in'acziun

Infurmaziuns

Sarah Huder, manadra dal Post da coordinaziun Violenza a chasa, Uffizi dal servetsch social dal Grischun, tel. +41 81 257 26 11, e‑mail Sarah.Huder@soa.gr.ch

Responsabladad: Uffizi dal servetsch social