Ensemen cun la Confederaziun ha la Regenza fixà l'ulteriur proceder per in'eventuala dischlocaziun da la caserna da Cuira al territori dal Rossboden. Ultra da quai ha ella deliberà contribuziuns chantunalas per l'engrondiment da l'arena da biatlon Planeiras e per la renovaziun dal chastè a Zizers.
La Regenza sustegna vinavant la dischlocaziun da la caserna da Cuira
La Confederaziun svizra, il chantun Grischun e la citad da Cuira han en mira che la plazza d'armas a Cuira vegnia mantegnida a lunga vista. La Regenza beneventa che la Confederaziun e la citad da Cuira vulan dischlocar la caserna da ses lieu actual al territori dal Rossboden. La dischlocaziun planisada permetta in svilup urbanistic persistent da l'areal actual da la caserna.
En il rom d'ina decleraziun d'intenziun èn la citad da Cuira ed il chantun s'accordads gia l'onn 2019 che la citad vuless surpigliar da la Confederaziun var trais tschintgavels da la surfatscha totala (51 000 meters quadrat) en il sectur ost ed il chantun var dus tschintgavels (34 000 meters quadrat) en il sectur vest da l'areal da la caserna. Il pretsch da cumpra per il bain immobigliar dal chantun importa circa 24 milliuns francs, quel da la citad da Cuira circa 36 milliuns francs. Ils 26 da settember 2021 votescha la populaziun da Cuira davart questa fatschenta da barat e da cumpra cun la Confederaziun, per che la dischlocaziun da l'armada al Rossboden possia insumma vegnir realisada e per che la citad da Cuira possia surpigliar ina part da l'areal da la caserna. Sin quai vegn la Regenza a decider davart il contract da cumpra per la part da l'areal dal chantun.
La finamira da la Confederaziun, dal chantun e da la citad è ina clusiun consensuala dals contracts da cumpra l'onn 2022. Tenor l'urari pudess uschia vegnir dischlocada la logistica militara circa l'onn 2030 da l'areal da la caserna en la citad al Rossboden ed alura surdada la proprietad da la caserna a la citad ed al chantun.
© armasuisse
La Confederaziun svizra, il chantun Grischun e la citad da Cuira han en mira che la plazza d'armas a Cuira vegnia mantegnida a lunga vista. La Regenza beneventa che la Confederaziun e la citad da Cuira vulan dischlocar la caserna da ses lieu actual al territori dal Rossboden.
Contribuziun chantunala per la pista da skis cun rodas da l'arena da biatlon Planeiras
En il rom dal Concept per implants da sport d'impurtanza naziunala (CISIN) conceda la Regenza a la vischnanca da Lantsch ina contribuziun chantunala da 420 000 francs per engrondir la pista da skis cun rodas da l'arena da biatlon Planeiras. La Confederaziun ha er empermess a la vischnanca ina contribuziun CISIN en l'autezza da 0,5 milliuns francs.
Il project custa var 3,3 milliuns francs e cuntegna ina prolungaziun da la pista da skis cun rodas existenta dad 1,4 kilometers sin da nov 3,8 kilometers.
© Biathlon Arena Lenzerheide AG
En il rom dal Concept per implants da sport d'impurtanza naziunala (CISIN) conceda la Regenza a la vischnanca da Lantsch ina contribuziun chantunala da 420 000 francs per engrondir la pista da skis cun rodas da l'arena da biatlon Planeiras.
Il chastè da Zizers vegn duvrà en autra moda
La Chastè da Zizers SA planisescha ina restructuraziun sco er ina midada d'utilisaziun per intents d'abitar dal tract principal sco er da l'uschenumnà edifizi nov dal chastè da Zizers. Per quest project garantescha la Regenza ina contribuziun chantunala da maximalmain 341 450 francs. En connex cun questa contribuziun vegn il chastè mess da qua envi sut protecziun da monuments chantunala.
En cas dal chastè da Zizers sa tracti d'in edifizi baroc. Ensemen cun ils edifizis vischins sco er cun il parc appartegnent è el in monument architectonic unic en il Grischun. El caracterisescha decisivamain il maletg dal lieu da Zizers ed è d'impurtanza istorica surregiunala. El è vegnì construì tranter ils onns 1670 e 1687 tenor ils plans da l'architect alsazian Kleber per il marschal Johan Rudolf von Salis. L'edifizi principal stat dapi l'onn 1973 er sut protecziun da la Confederaziun. En il rom dal project da restructuraziun qua avant maun datti abitaziuns generusas resguardond las structuras da basa istoricas e l'aspect exteriur. Ils custs totals vegnan calculads cun circa 17,3 milliuns francs.
La Chastè da Zizers SA planisescha ina restructuraziun sco er ina midada d'utilisaziun per intents d'abitar dal tract principal sco er da l'uschenumnà edifizi nov dal chastè da Zizers. Per quest project garantescha la Regenza ina contribuziun chantunala da maximalmain 341 450 francs.
Ils parcs grischuns daventan ina part da l'exposiziun permanenta en il Center dal Parc naziunal svizzer
La Regenza conceda a l'Uniun Parcs grischuns ina contribuziun chantunala da maximalmain 122 500 francs per realisar il project «Preschentaziun dals parcs grischuns en l'exposiziun permanenta en il Center dal Parc naziunal svizzer».
L'exposiziun permanenta en il Center dal Parc naziunal svizzer a Zernez vegn concepida da nov ed averta l'onn 2023. En il rom da questa nova concepziun sa porscha a l'Uniun Parcs grischuns la pussaivladad d'augmentar la visibilitad da tut ils parcs grischuns. Da nov duai vegnir infurmà en l'exposiziun er davart ils parcs natirals grischuns, davart il patrimoni natiral mundial da la UNESCO Arena tectonica Sardona sco er davart il reservat da biosfera da l'UNESCO Engiadina Val Müstair. Planisà èsi d'infurmar las visitadras ed ils visitaders dal center sur ina paraid da projecziun interactiva da circa trais sin quatter meters. Previsas èn d'ina vart infurmaziuns generalas sco las premissas, las incumbensas e las finamiras da parcs natirals. Da l'autra vart vegnan integrads purtrets dals parcs grischuns. En quests purtrets dals parcs duain vegnir preschentadas infurmaziuns e particularitads davart las purschidas, davart ils products, davart las valurs natiralas e culturalas sco er davart activitads e davart projects dals parcs.
Ils custs totals per realisar questa preschentaziun entaifer l'exposiziun permanenta importan 177 360 francs.
© SNP / Hans Lozza
La Regenza conceda a l'Uniun Parcs grischuns ina contribuziun chantunala da maximalmain 122 500 francs per realisar il project «Preschentaziun dals parcs grischuns en l'exposiziun permanenta en il Center dal Parc naziunal svizzer».
