Las interpresas grischunas che pateschan fitg da las consequenzas da la pandemia da COVID-19 pon dumandar sustegn finanzial en furma d'agids per cas da direzza. Interpresas che han inoltrà a temp la dumonda ordinaria fin ils 30 da zercladur 2021, pon anc inoltrar posteriuramain ina dumonda per las ulteriuras perditas da la svieuta ch'ellas han subì fin il zercladur 2021. Il termin vertent per inoltrar posteriuramain perditas da la svieuta (15 d'avust 2021) vegn prolungà per bundant duas emnas. Suenter ch'il nov termin dals 31 d'avust 2021 è scadì, na vegnan acceptadas naginas dumondas posteriuras pli.

Las interpresas cun ina svieuta annuala da fin 5 milliuns francs che han fatg l'emprima dumonda ordinaria per agids per cas da direzza fin ils 30 da zercladur 2021, survegnan contribuziuns da sustegn per las perditas da la svieuta ch'ellas han subì fin il mars 2021 pervia da la pandemia. Perquai che las mesiras uffizialas han durà anc fin il cumenzament da la stad, pon questas interpresas er anc inoltrar las perditas da la svieuta ch'ellas han subì durant ils mais avrigl fin zercladur 2021. Il termin respectiv vegn ussa prolungà fin ils 31 d'avust 2021. Prolungaziuns dals termins na vegnan betg concedidas.

Quest termin vala er per interpresas cun ina svieuta annuala da passa 5 milliuns francs. Questas interpresas èn vegnidas sustegnidas – en il rom d'ina emprima dumonda ordinaria ch'ellas han stuì inoltrar fin ils 30 da zercladur 2021 – cun contribuziuns per las perditas da la svieuta durant ina perioda ch'ellas han tschernì sezzas. Er questas interpresas pon inoltrar definitivamain fin ils 31 d'avust 2021 anc ulteriuras perditas da la svieuta ch'ellas han subì fin la fin da zercladur 2021.

Il termin per l'emprima dumonda ordinaria, ch'è scadì ils 30 da zercladur 2021, NA VEGN BETG prolungà.

Las proceduras na sa midan betg:

• Interpresas cun ina svieuta annuala da fin 5 milliuns francs ston duvrar in formular online che stat a disposiziun sin la pagina d'internet dal Departament d'economia publica e fatgs socials (Mesiras per cas da direzza).
• Interpresas cun ina svieuta annuala da passa 5 milliuns francs vegnan infurmadas mintgina per sasezza directamain per e-mail davart il proceder.

Betg pertutgà dal termin fin la fin d'avust 2021 n'è il fatg, che interpresas cun dumondas incumplettas pon anc vegnir supplitgadas da furnir suenter ulteriurs documents.

Infurmaziuns:

Responsabladad: Departament d'economia publica e fatgs socials