La Cumissiun per giustia e segirezza (CGS) dal Cussegl grond ha elegì sin dumonda da la Dretgira chantunala dal Grischun per dus onns derschadras extraordinarias en la dimensiun da 200 pertschients da plazzas.
En la sessiun da favrer 2021 ha il Cussegl grond revedì parzialmain la Lescha davart l'organisaziun giudiziala. Uschia è vegnida stgaffida la pussaivladad da rinforzar las dretgiras chantunalas cun dapli persunal, sche derschadras u derschaders èn impedids per pli ditg d'exequir lur uffizi u sche las dretgiras n'èn betg pli en cas – pervia d'ina chargia da lavur extraordinaria – da liquidar dispitas giuridicas entaifer in termin adequat. La cumpetenza per eleger talas derschadras e tals derschaders extraordinaris ha la lescha mess en ils mauns da la Cumissiun da giustia dal Cussegl grond. Ils 15 da zercladur 2021 è questa revisiun parziala entrada en vigur.
Reducziun dal dumber da cas pendents en la Dretgira chantunala dal Grischun
Il grond dumber da cas pendents en la Dretgira chantunala ha plirs motivs. La refurma da la giustia 2 cun la nova organisaziun da las dretgiras chantunalas superiuras ha per part contribuì a questa situaziun, sco er las pretensiuns creschentas a la motivaziun da las sentenzias, ch'il Tribunal federal pretenda. Il Cussegl grond ha reagì sin quai cun stgaffir ina sisavla plazza da derschader a la Dretgira chantunala dal Grischun. L'effect n'ha però betg pudì sa sviluppar pervia da mancanzas da persunal. La Dretgira chantunala lavura puspè en sia cumposiziun cumplaina a partir dad oz. Pervia da las resursas persunalas n'è el dentant betg en cas da liquidar – sper las fatschentas quotidianas – er las pendenzas accumuladas entaifer in termin adequat. Pervia da quai ha la Dretgira chantunala dumandà, sa basond sin la revisiun parziala da la Lescha davart l'organisaziun giudiziala da la CGS, da la metter a disposiziun derschadras e derschaders extraordinarias per la durada da dus onns ed en la dimensiun da 200 pertschients da plazzas. La CGS ha examinà questa dumonda e vesa la necessitad d'in sustegn persunal per reducir il dumber dals cas pendents.
La CGS ha elegì trais derschadras extraordinarias
Correspundentamain ha la CGS publitgà las plazzas giavischadas e fatg ina procedura d'annunzia. Dus mais suenter l'entrada en vigur da la revisiun da la lescha ha la CGS pudì eleger supplementarmain per dus onns dunna Seraina Aebli, dunna Andrea Bäder Federspiel e dunna Chiara Richter sco derschadras extraordinarias per la Dretgira chantunala dal Grischun. Cun quai vul la cumissiun garantir che dispitas giuridicas davant la Dretgira chantunala possian vegnir liquidadas proximamain puspè entaifer in termin adequat. Ina giustia che funcziuna bain sa caracterisescha – ultra tras ina buna qualitad da las sentenzias – er tras decisiuns che vegnan prendidas entaifer in temp acceptabel.
Infurmaziuns:
president da la cumissiun Gian Derungs, tel. +41 79 641 30 72
Responsabladad: Cumissiun per giustia e segirezza