Sin basa dal Plan per il svilup dal guaud (PSG2018+) ha l'Uffizi da guaud e privels da la natira elavurà la strategia Biodiversitad forestala en il Grischun 2035 e publitgà quella l'onn passà. En la vischnanca da Valsot en Engiadina Bassa èn vegnids declerads ussa ils cuntegns ils pli impurtants da questa strategia e preschentads a maun d'in exempel al lieu.

La diversitad da las spezias e dals spazis da viver en il guaud è gronda, però smanatschada en tschertas parts. Quai cumbain che la persistenza en la cultivaziun dal guaud ha dapi adina ina gronda impurtanza e cumbain che l'utilisaziun na dastga betg esser pli gronda ch'il creschament natiral.

Laschar il spazi necessari a la natira: reservats da guaud natiral ed inslas da laina veglia
Durant in temp pli lung èsi vegnì dà mo pauc spazi e mo pauc temp a la natira per ses andament dals process natirals. En il guaud èn oz perquai sutrepreschentads bostgs pli vegls. Per cumpensar quai duvrassi in pèr decennis cun in'utilisaziun tras l'uman fermamain reducida. La determinaziun da reservats da guaud natiral pli gronds e d'inslas da laina veglia pli pitschnas conceda puspè dapli plazza a quests andaments natirals e garantescha uschia a pli lunga vista quests process natirals. La part da quests reservats da guaud natiral en cumparegliaziun cun l'entira surfatscha da guaud è oz 3,3 pertschient. Questa part duai vegnir augmentada – tenor la strategia Biodiversitad forestala en il Grischun – sin 5,5 pertschient fin l'onn 2035. Tras quai vegn surpassada la finamira naziunala da 5 pertschient.

Mantegnair las structuras preziusas: reservats da guaud spezial e tgira dals guauds
Per ademplir las bleras funcziuns dal guaud èn la cultivaziun e la tgira dal guaud ina basa necessaria. Cun intervegnir a temp po vegnir stgaffida e mantegnida ina varietad da las structuras che mancass en blers lieus senza l'influenza da l'uman. Gist questas structuras porschan lura er in spazi da viver che vegn populà oz d'in grond dumber da spezias da plantas e d'animals. Per che quests spazis da viver prezius che ston vegnir tgirads, restian mantegnids e possian vegnir utilisads a pli lunga vista, vegnan bleras da questas surfatschas garantidas sco reservats da guaud spezial tras in contract tranter il chantun ed ils proprietaris da guaud. La finamira naziunala dals reservats da guaud spezial, tenor la quala quests guauds duain cuntanscher 5 pertschient da la surfatscha da guaud totala da la Svizra, è en il Grischun gia oz quasi ademplida cun ina part da 4,8 pertschient. Per mantegnair e per extender l'auta qualitad da quests spazis da viver po lur part schizunt vegnir surpassada fin l'onn 2035. Decisiv per realisar ulteriurs reservats da guaud spezial è però il basegn da las vischnancas grischunas, las proprietarias da guaud las pli impurtantas dal chantun.

In guaud da lareschs pasculà survegn dapli valur
En bleras regiuns dal chantun ha il laresch ina fitg gronda valur. Correspundentamain èn sa furmads sur tschientaners guauds da lareschs, quai tras la cultivaziun e tras la pasculaziun cun animals da niz. Sch'il potenzial local per tals guauds è dà, pon mesiras selviculturalas servir a mantegnair ed a dar dapli valur a quests guauds. A medem temp vegni cunvegnì cun il cultivatur, ch'el mantegnia las structuras ch'èn impurtantas per il guaud da lareschs e ch'el garanteschia l'utilisaziun da quest guaud. Co ch'il guaud ademplescha a medem temp differentas funcziuns, vesan ins a maun da l'exempel sur Ramosch, nua ch'il guaud n'è betg mo in spazi da viver prezius, mabain surpiglia er funcziuns da protecziun. Suenter l'intervenziun da l'onn 2019 existan gia numerus scherms da laresch ed ina vegetaziun d'ervas ritga da spezias sin questa surfatscha, quai cunzunt grazia a la rumida dal tagl en il sectur da pitschens lieus ch'èn favuraivels a la regiuvinaziun.

Fotografia agiuntada:

Infurmaziuns:

Responsabladad: Departament d'infrastructura, energia e mobilitad