Tgi che sa participescha als tests en ils manaschis en il Grischun po dumandar a partir da mardi, ils 12 d'october 2021, in certificat dal test. Il test sto dentant esser negativ.

Dapi ch'il Cussegl federal ha introducì l'obligatori da certificat, è la dumonda da tests creschida fermamain tar las instituziuns che porschan tests (apotecas, centers da test, praticas da medias e da medis) en il chantun. Per che las structuras existentas na vegnian betg surchargiadas durant las vacanzas d'atun sco er durant la proxima stagiun d'enviern, pussibilitescha il chantun Grischun da retrair, a partir dals 12 d'october 2021, certificats per ils tests cun in resultat negativ che vegnan fatgs en il rom dals tests en ils manaschis.

Las persunas che sa participeschan als tests en ils manaschis pon dumandar in certificat dal test sur la plattafurma existenta easytesting.ch, cur ch'ellas registreschan ina nova prova. Suenter l'analisa en il labor vegn tramess in SMS u in e-mail cun in link per chargiar giu il certificat ch'è valaivel 72 uras (a partir da la registraziun da la prova). Ils certificats da test èn per entant fin ils 30 da november 2021 gratuits.

Actualmain sa participeschan var 2000 interpresas als tests repetitivs en il chantun Grischun.

Excepziuns per tests svelts d'antigens gratuits
A partir dals 11 d'october 2021 n'èn ils tests svelts d'antigens che las persunas asintomaticas laschan far en centers da test, en praticas da medias e da medis, en ospitals u en apotecas cun l'intent da survegnir in certificat, betg pli gratuits. Vinavant gratuits èn ils tests svelts d'antigens che vegnan fatgs en centers da test, en praticas da medias e da medis, en ospitals u en apotecas per:

• persunas cun sintoms (senza certificat dal test)
• uffants e giuvenils sut 16 onns
• persunas che na pon betg sa laschar vaccinar per motivs medicinals (en quest cas dovri in attest dal medi)
• visitadras e visitaders d'instituziuns da sanadad (senza certificat dal test)

Ils custs per ils tests da persunas vaccinadas ina giada che laschan emetter in certificat, vegnan surpigliads da la Confederaziun fin che la vaccinaziun è cumpletta, dentant maximalmain fin ils 30 da november 2021.

Infurmaziuns:

Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias).

Responsabladad: Uffizi da sanadad