La Regenza vul cuntinuar cun il program graubündenVIVA e fa perquai ina incarica da prestaziun cun l'uniun graubündenVIVA per ils onns 2022–2026. Cun la cuntinuaziun dal program en ils secturs regiunalitad e culinarica vul la Regenza, ensemen cun organisaziuns partenarias, manar vinavant la lavur da svilup prosperaivla dals ultims onns per posiziunar il chantun Grischun sco center da la cultura da giudiment alpina.

En il sectur da l'economia alimentara dispona il chantun Grischun d'in grond potenzial per crear valurs. En il program da la regenza 2021–2024 accentuescha il chantun l'impurtanza dal champ tematic "alimentaziun regiunala e turissem". Tenor quel duai vegnir promovida la diversitad da l'economia, en spezial en ils secturs dal turissem e da la producziun da victualias. Il potenzial da la producziun sco er da l'elavuraziun persistenta da victualias regiunalas è grond e la dumonda per tals products crescha anc adina.

Cun la cuntinuaziun da graubündenVIVA vul la Regenza rinforzar vinavant il sistem alimentar regiunal dal Grischun. Grazia ad ina collavuraziun colleghiala duai il program qualifitgar las acturas ed ils acturs da l'agricultura, da l'elavuraziun, dal turissem e da la gastronomia da sviluppar innovaziuns e da stgaffir ed amplifitgar effects persistents da la creaziun da valurs.

Stgaffir in center da la rait per graubündenVIVA
Per cuntinuar cun las activitads operativas vegn sviluppada ina nova furma d'organisaziun. Empè da l'organisaziun da la realisaziun da fin qua, la graubündenVIVA SA, vegn stgaffì in center da la rait che vegn manà da l'uniun graubündenVIVA. Quest center è responsabel per realisar las mesiras. A partir da l'emprim quartal 2022 duai quel lura manar vinavant las activitads da la graubündenVIVA SA. Il center da la rait collavura fitg stretg cun il Plantahof sco er cun l'organisaziun per la promoziun da la vendita alpinavera. I sa tracta da nizzegiar uschè bain sco pussaivel l'entir know-how da las duas organisaziuns existentas en ils champs d'acziun sco er da profitar da las sinergias che resultan da lur stretga collavuraziun.

L'uniun graubündenVIVA è responsabla per la gestiun strategica dal program graubündenVIVA ed uschia er per la gestiun dal center da la rait. Sin basa da l'incarica da prestaziun ha l'uniun l'incumbensa da realisar ils inputs strategics per posiziunar il Grischun sco center da la cultura alpina da giudiment. Ils detagls vegnan definids en ina incarica da prestaziun dal chantun cun l'uniun.

Il Grischun duai daventar il center da la cultura alpina da giudiment
Tut las activitads da graubündenVIVA han da s'orientar a la profilaziun dal sistem alimentar grischun e ston suandar il princip da la persistenza. graubündenVIVA persequitescha relaziuns a lunga vista cun ils furniturs da prestaziuns e cun ils partenaris entaifer las chadainas da creaziuns da valur. Grazia ad ina vasta purschida da prestaziuns daventa l'organisaziun ina partenaria ferma ed attractiva per tut las dumondas da la culinarica e dal sistem alimentar grischun.

Finanziaziun sin basa da la Lescha d'agricultura e da la Lescha davart il svilup economic
Per realisar las finamiras en ils champs d'acziun strategics resultan durant ils onns 2022–2026 custs annuals da maximalmain 990 000 francs per il chantun. Sin basa da la Lescha chantunala per mantegnair e promover l'agricultura succeda la finanziaziun cun maximalmain 792 000 francs per onn. Ina contribuziun cumplementara da maximalmain 198 000 francs vegn concedida sin basa da la Lescha per promover il svilup economic en il chantun Grischun.

Infurmaziuns:

Responsabladad: Regenza