Il bus da vaccinaziun grischun terminescha oz sia segunda runda. Tut en tut èn vegnidas realisadas var 8000 vaccinaziuns en il bus. Pervia da las temperaturas bassas vegn el ussa per entant prendì ord funcziun. Percunter cumenza in'equipa da vaccinar mobila in terz gir cun 21 staziuns e prenda cun sai da nov er il vaccin vectorial COVID-19 Vaccine Janssen.
Il bus da vaccinaziun terminescha oz ses engaschament dad 8 emnas. El è stà duas giadas en 38 lieus da tut las regiuns dal chantun ed ha pussibilità a la populaziun in access simpel a la vaccinaziun. Plinavant ha el dà l'occasiun da survegnir ina cussegliaziun nunlianta davart la vaccinaziun. Tut en tut èn vegnidas fatgas 8000 vaccinaziuns en il bus.
Equipa da vaccinar mobila remplazza bus da vaccinaziun
A partir da mardi, ils 19 d'october 2021, cumenza in'equipa da vaccinar mobila in terz gir cun 21 staziuns. Ultra dals vaccins da Moderna e da Pfizer/BioNTech prenda l'equipa da vaccinar cun sai da nov er il vaccin vectorial COVID-19 Vaccine Janssen:
- Las persunas che sa decidan per in'emprima vaccinaziun cun Pfizer/BioNTech, survegnan la segunda vaccinaziun en ils centers da vaccinaziun a Cuira ed a Landquart.
- Las persunas che sa decidan per in'emprima vaccinaziun cun Moderna, survegnan la segunda vaccinaziun en in center da vaccinaziun regiunal, tar lur media u medi da chasa u en in'apoteca.
COVID-19 Vaccine Janssen è in vaccin vectorial
Il vaccin COVID-19 Vaccine Janssen è in uschenumnà vaccin vectorial. Tscherts tocs dal ADN èn cumbinads cun in virus da dafraid benign (in uschenumnà «vectur») e vegnan recepids uschia en las cellas dal corp. Quests tocs dal ADN servan al sistem d'immunitad dal corp ed èn in plan per construir la resposta immunitara e per furmar anticorpuls cunter il coronavirus. Il vaccin COVID-19 Vaccine Janssen vegn injectà ina giada e vegn recumandà a persunas a partir da 18 onns che na pon betg sa laschar vaccinar cun in vaccin mRNA per motivs medicinals (cunterindicaziun medicinala) ed a persunas a partir da 18 onns che refusan ils vaccins mRNA. L'immunisaziun cun Janssen na vegn betg recumandada a dunnas en speranza sco er a persunas cun in sistem d'immunitad supprimì. A la gruppa da persunas cun in sistem d'immunitad supprimì dattan vaccins mRNA ina meglra resposta immunitara.
Las datas dal gir da l’equipa mobila, ina survista da las pussaivladads da walk-in, l'annunzia electronica per in termin da vaccinaziun sco er ulteriuras infurmaziuns stattan a disposiziun da tut temp sin www.gr.ch/impfung. A chaschun da l'annunzia e suenter l'endataziun da las datas, pudais Vus dumandar da survegnir il vaccin COVID-19 Vaccine Janssen.
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias)
Cumpetenza: Uffizi da sanadad