La Regenza ha surdà l'incumbensa per l'edifizi nov dal Center da la scola auta spezialisada dal Grischun al team dals planisaders generals dal project «PARTENARIS» sut la direcziun dal biro d'architectura Giuliani Hönger architects da Turitg. L'edifizi nov duai augmentar las schanzas da furmaziun da la giuventetgna e far frunt a la mancanza da persunas spezialisadas en las interpresas indigenas.

Durant ils ultims onns han l'augment dal dumber da studentas e students sco er l'augment dal volumen da perscrutaziun en la SAS dal Grischun gì per consequenza che localitads supplementaras han adina puspè stuì vegnir prendidas en locaziun. La scola auta spezialisada è pia repartida oz sin tschintg lieus en nov edifizis entaifer la citad da Cuira. En quests lieus mancan las localitads per sviluppar vinavant en moda progressiva il manaschi da scola auta. Per cuntentar commensuradamain las pretensiuns envers ina infrastructura actuala da localitads per in manaschi modern da scola auta, ha il Cussegl grond approvà l'october 2018 da realisar in Center da scola auta sin l'areal Pulvermühle ed ha incumbensà la Regenza d'organisar ina concurrenza da projects. La finamira surordinada dal project da construcziun è quella da far avanzar il Grischun e da preparar la giuventetgna per las pretensiuns che s'augmentan e che sa midan en il mund professiunal ed en il mund da lavur.

L'impurtanza da la SAS dal Grischun per il chantun
Ord vista da la furmaziun, da la perscrutaziun e da la politica d'innovaziun è la realisaziun d'in Center da scola auta da gronda impurtanza per il chantun Grischun. La mancanza da persunas spezialisadas, particularmain en las disciplinas tecnicas ed en las scienzas natiralas, engrevgescha a bleras interpresas grischunas da far las expansiuns necessarias ed il svilup giavischà. En quest ambient pretensius dal punct da vista economic è la SAS dal Grischun in actur impurtant per scolar e per promover glieud giuvna ed a medem temp per rinforzar la cumpetitivitad da l'economia publica dal Grischun. Ina scola auta spezialisada ch'è enragischada en la regiun, gida a garantir ina scolaziun attractiva e d'auta qualitad. En il Grischun po ella promover l'immigraziun da talents e da persunas spezialisadas e dal Grischun po ella reducir l'emigraziun da persunas spezialisadas sco er d'absolventas e d'absolvents d'ina scola auta. Tras il nov Center da scola auta vegn il Grischun sco center da furmaziun e da scienza, che stat en l'interess da la glieud giuvna e da l'economia, fatg meglier visibel suror il cunfin chantunal.

Il Center da scola auta duai transmetter unitad
La finamira da la concurrenza da projects ch'è vegnida organisada en moda selectiva da l'Uffizi chantunal da construcziun auta, è stada quella d'evaluar in team da planisaders generals ch'è adattà per sviluppar in project funcziunal, che persvada dal punct da vista da l'architectura locala e da l'architectura sco tala e ch'è persistent. Ultra da quai duai il team garantir – en il rom da la realisaziun – ch’ils criteris dumandads pertutgant la qualitad e pertutgant la rentabilitad e ch'il criteri d'observar ils termins fixads vegnian ademplids. La procedura da concurrenza tschernida ha ultra da quai garantì la diversitad giavischada da las ideas da project per in Center da scola auta che furma identitad e ch'è adattà per l'instrucziun e per la perscrutaziun interdisciplinara.

«PARTENARIS» sa fa valair
La publicaziun da la concurrenza da projects ha procurà per tut en tut 57 candidaturas. Silsuenter ha la giuria selecziunà 13 teams da planisaziun ed ha incumbensà quels d'elavurar in project. Dals projects ch'èn lura vegnids proponids è resultà il project «PARTENARIS» dal team da planisaders sut la direcziun dal biro d'architectura Giuliani Hönger architects da Turitg sco project victur. En il giudicament da la giuria ha il project da quest biro ademplì il meglier ils criteris. Il project sa fa valair cunzunt perquai ch'el tracta en moda integrala ils criteris architectura, structura purtanta e persistenza, adina resguardond la funcziunalitad. Plinavant persvada el perquai ch'el posiziunescha bain l'edifizi nov en l'architectura municipala, integrescha en moda equilibrada ils edifizis existents e concepescha il spazi exteriur en moda sumeglianta ad in parc. Quai gida ad obtegnair in'auta qualitad da dimora e d'inscunter sin l'areal da scola auta. La planisaziun prevesa plinavant da render l'utilisaziun flexibla. Quai è d'ina impurtanza centrala en vista al futur svilup da la scola auta spezialisada. La Regenza prenda enconuschientscha dal giudicament e consenta a la proposta da la giuria da surdar al team victur l'incumbensa per l'edifizi nov dal Center da scola auta da la SAS dal Grischun.

Ils proxims pass fin il cumenzament da las lavurs da construcziun
Il project victur vegn ussa planisà vinavant. Silsuenter vegn el suttamess al Cussegl grond ensemen cun ina missiva per l'approvaziun e per la concessiun dals credits d'impegn necessaris. Il Conclus dal Cussegl grond è suttamess al referendum obligatoric. Igl è previs da cumenzar cun las lavurs da construcziun la fin da l'onn 2024. Las lavurs da construcziun vi da l'edifizi d’engrondiment dal nov Center da scola auta vegnan probablamain terminadas l'onn 2028.

Exposiziun publica
En il rom d'ina exposiziun publica pon vegnir contemplads tut ils 13 projects da concurrenza. L'exposiziun dura dals 25 d'october fin ils 5 da november 2021. Ella è averta mintgamai glindesdi, mesemna e gievgia da las 11.00 fin las 14.00 sco er mardi e venderdi da las 16.00 fin las 19.00 e sa chatta en il foyer da la SAS dal Grischun a la Pulvermühlestrasse 57 a Cuira. L'entrada è pussaivla mo cun il certificat da COVID e cun in document d'identitad. Tut las infurmaziuns davart l'exposiziun sco er davart ulteriuras occurrenzas en connex cun il Center da scola auta stattan a disposiziun sin la pagina d'internet da la SAS dal Grischun.

Agiunta: 

Rapport da la giuria

Visualisaziuns:

vista da l'interiur

extract dal model 3D dal project victur

Infurmaziuns:

- Represident da la Regenza dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e‑mail Mario.Cavigelli@diem.gr.ch

- Markus Dünner, architect chantunal, Uffizi da construcziun auta dal Grischun, tel. +41 81 257 36 31, e‑mail Markus.Duenner@hba.gr.ch

Responsabladad: Departament d'infrastructura, energia e mobilitad