Per la perioda d'uffizi dal 1. da schaner 2022 fin ils 31 da december 2023 ha la Regenza confermà las suandantas persunas sco commembra e commembers dal Cussegl turistic dal Grischun:

- prof. dr. Thomas Bieger, Universitad da Son Gagl (dapi il fanadur 2020)
- prof. dr. Antonia Albani, Universitad da Son Gagl (dapi l'onn 2018)
- Marcus Bernhardt, CEO da Steigenberger Hotels SA / Deutsche Hospitality (dapi l'onn 2018)
- Rolf Schafroth, possessur da Pecros Management Consulting ScRL (dapi l'onn 2014)
- Beat Zaugg, CEO da Scott Sports SA (dapi il fanadur 2020)
- Alois Zwinggi, commember da la direcziun da la fundaziun dal Forum economic mundial (dapi l'onn 2014)

D'uffizi èn plinavant participads vinavant al Cussegl turistic il cusseglier guvernativ Marcus Caduff, schef dal Departament d'economia publica e fatgs socials, e Jürg Schmid, president da Grischun Vacanzas. Sco president per questa perioda d'uffizi è vegnì confermà prof. dr. Thomas Bieger.

Il Cussegl turistic cusseglia la Regenza ed ils acturs turistics davart temas strategics, cunzunt davart l'ulteriur svilup da las destinaziuns. El dat novs impuls per la cumpetitivitad internaziunala e promova per quest intent il svilup da projects innovativs. El procura per ina perspectiva externa creativa e critica e per in dialog progressiv cun ils acturs turistics.

Ils chantuns da la Svizra Orientala sco er il chantun Turitg sco commember associà èn s'exprimids a favur d'in ulteriur engaschament al program Interreg «Rain Alpin-Lai da Constanza-Rain Aut». Uschia vegn lantschada gia la sisavla perioda da promoziun 2021–2027 da la collavuraziun transcunfinala prosperaivla.

Tant la cuntinuaziun dal mandat per il center da la rait da la Svizra orientala sco er la finanziaziun èn vegnidas instradadas. Il chantun Grischun sa participescha er vinavant al program en in rom finanzial sumegliant, dentant in zic pli bass.

La Regenza ha approvà l'elavuraziun dals toms 3 e 4 dal med d'instrucziun «connected» cun ina plattafurma d'internet en talian. Ils custs per elavurar il med d'instrucziun importan var 120 000 francs. 

Cun il Plan d'instrucziun 21 (PI21 GR) è vegnì introducì er il nov rom «medias ed informatica» en la scola populara dal Grischun durant l'onn da scola 2018/19, e quai en la 5. e 6. classa dal stgalim primar. Per sustegnair las persunas d'instrucziun en quest nov rom impurtant, stat il med d'instrucziun «inform@21» a disposiziun en tut las linguas da scola. Dapi l'onn da scola 2020/21 vegn tal duvrà sco med d'instrucziun obligatoric. Las scolaras ed ils scolars midan da nov al stgalim secundar I cun las cumpetenzas ch'ellas ed els han acquistà specificamain durant dus onns da scola. A medem temp è vegnida dublegiada la dotaziun da lecziuns per quest rom sin il stgalim secundar I. Quests facturs premettan d'adattar l'instrucziun er sin il stgalim secundar I. Las persunas d'instrucziun dal stgalim secundar I en il Grischun talian duain da nov vegnir sustegnidas cun ils toms 3 e 4 dal med d'instrucziun «connected», ch'èn vegnids elavurads tenor il PI21 GR. 

Per ils onns 2021–2024 ha la Regenza approvà ina cunvegna da prestaziun tranter il chantun Grischun e la Pro Junior Grischun. L'incumbensa da la Pro Junior Grischun concerna l'installaziun ed il manaschi d'in post da coordinaziun «PAT – Emprender cun geniturs» en il Grischun e la realisaziun operativa dal program en las vischnancas da pilot. Il project da pilot cuntegna in program preventiv da visitas a chasa per famiglias cun uffants en la vegliadetgna prescolara ed è ina da las mesiras per sviluppar vinavant la politica chantunala d'uffants e da giuvenils.

Cun concepir e cun sviluppar vinavant la politica chantunala d'uffants e da giuvenils vul la Regenza stgaffir cundiziuns da viver attractivas per famiglias, per uffants e per giuvenils. Ina promoziun d'auta qualitad promova il svilup d'uffants e da giuvenils a commembers responsabels da la societad.

La Regenza ha approvà in project da renovaziun e da sanaziun da l'uniun MOVIMENTO a Puschlav. L'uniun maina là ina chasa da dimora, in lavuratori protegì sco er in center da di per persunas cun impediments. Als custs totals dal project da renovaziun dad 1 424 100 francs sa participescha il chantun cun ina contribuziun da maximalmain 1 139 300 francs.

L'edifizi da trais plauns è vegnì construì l'onn 1825 e sanà l'ultima giada l'onn 1998. Ussa èn planisadas ina sanaziun cumplessiva ed in'optimaziun da las relaziuns da spazi. En il center da quest project stat l'engrondiment dal palantschin, che permetta da stgaffir dapli spazi per las utilisadras ed ils utilisaders da la structura dal di. Il vau da l'ascensur vegn auzà per in plaun e pussibilitescha uschia in access senza barrieras al palantschin. Plinavant èn ils stgaudaments electrics existents sensibels per disturbis e la tocca da reserva n'è strusch da survegnir. Ils stgaudaments electrics duain vegnir remplazzads tras ina pumpa da chalur sin basa da l'aria e da l'aua.

Per las Ovras electricas Glion SA (OEG) a Glion ha la Regenza ordinà la sanaziun da l'aua restanta ch'è prescritta da la lescha. La gestiunaria da las ovras electricas vegn uschia obligada da restituir ina quantitad d'aua da dotaziun dad 80 liters per secunda tar la tschiffada Ual da Siat.

Cun las sanaziuns prescrittas dal dretg da la protecziun da las auas vegni tegni quint dals interess da las auas currentas e dals spazis da viver che dependan dad ellas.