La vischnanca da Domat surdat sias incumbensas da la polizia communala da nov a la Polizia chantunala dal Grischun. Uschia surpiglia la Polizia chantunala incumbensas en ils secturs da la segirezza publica, dal traffic e da l'administraziun a Domat.
Cun surdar las incumbensas da la polizia communala fa la vischnanca da Domat in pass ch'è orientà vers il futur. Per il chantun Grischun è la conclusiun da quest contract in signal impurtant per la buna collavuraziun da la Polizia chantunala cun la vischnanca e per la preschientscha da la Polizia chantunala en tut il chantun.
Repartiziun da las incumbensas e francaziun en las regiuns
Las vischnancas èn responsablas per la polizia da segirezza sin lur territoris communals. Ultra da quai adempleschan ellas incumbensas da basa da la polizia administrativa che las vegnan attribuidas da la legislaziun speziala. Latiers tutgan per exempel ils fatgs dal rument u la protecziun da las nunfimadras e dals nunfimaders. Questas incumbensas pon vegnir surdadas per contract a la Polizia chantunala dal Grischun. Tenor la Lescha da polizia ademplescha la Polizia chantunala dal Grischun en spezial las incumbensas da la polizia giudiziala e da la polizia da traffic (per exempel chastiar malfatgs), cun excepziun da la regulaziun dal traffic sin vias communalas, sco er la gronda part da l'agid uffizial e da l'agid d'execuziun. Resalvadas exclusivamain a la Polizia chantunala èn la protecziun dal stadi sco er l'applicaziun da mesiras repressivas polizialas.
La populaziun percepescha la Polizia chantunala dal Grischun cun sias patruglias e cun la francaziun en tut il chantun sco organ surregiunal. Ella procura per segirezza e per proximitad a las burgaisas ed als burgais. Uschia survegn il chantun Grischun cun la conclusiun da quest contract er la confidenza sco partenari fidà.
Agiunta:
Preschentaziun da las incumbensas polizialas
Fotografia:
da sanestra a dretga: il chanzlist communal Lucas Collenberg, il president communal Erich Kohler, il cumandant da polizia Walter Schlegel, il cusseglier guvernativ Peter Peyer, Daniel Meyer (schef dal departament Ambient e segirezza)
Infurmaziuns:
- cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e‑mail Peter.Peyer@djsg.gr.ch
- colonel Walter Schlegel, cumandant da la Polizia chantunala, tel. +41 81 257 79 50, e‑mail Walter.Schlegel@kapo.gr.ch
Responsabladad: Departament da giustia, segirezza e sanadad