Igl è enconuschent che las dunnas èn sutrepreschentadas en la politica. Cun il Parlament da mattas dat il Post da stab per l'egualitad da las schanzas la pussaivladad a dunnas giuvnas da far emprimas experientschas en la lavur parlamentara. Il Parlament da mattas ha lieu ils 11 da november 2021 per la quarta giada – per l'emprima giada cun translaziun simultana en talian. Accumpagnadas vegnan las 72 mattas da 15 parlamentarias e parlamentaris.

Cur che la presidenta dal Cussegl grond Aita Zanetti avra ils 11 da november 2021 a las 09.45 la sessiun en la sala dal Cussegl grond, na sesan per ina giada betg 120 deputadas e deputads davant ella, mabain 72 scolaras grischunas dal stgalim superiur e dal gimnasi. A chaschun dal 4. Parlament da mattas dal Grischun tractan ellas dumondas politicas actualas, elavuran propostas per quatter circuls tematics tschernids e debatteschan en chaussa. Las petiziuns elavuradas vegnan surdadas a la fin dal di al president da la Regenza Mario Cavigelli e tractadas pli tard dal Cussegl grond.

Per l'emprima giada cun translaziun simultana en talian
La lavur parlamentara da las mattas vegn sustegnida da 13 commembras e commembers dal Cussegl grond sco er d'ina parlamentaria en uffizi e d'ina anteriura parlamentaria da Cuira. Grazia a la translaziun simultana pon las 15 participantas da lingua taliana s'exprimer en lur lingua materna. Il Post da stab per l'egualitad da las schanzas porscha questa occurrenza en il rom dal Di naziunal da l'avegnir.

Discussiuns inspiradas da fatschentas politicas actualas
Las mattas han pudì inditgar ordavant lur prioritads tematicas. In tema spezialmain dumandà è «gender e sexissem». Ulteriurs temas èn la midada dal clima, l'avegnir en il Grischun sco er la furmaziun e la digitalisaziun. L'avantmezdi elavuran cumissiuns propostas tar quests temas. Tematisadas vegnan fatschentas politicas actualas e discussiuns currentas da la societad. A mezdi sa preschenta la Sessiun dals giuvenils dal Grischun cun l'intent da mussar ulteriuras vias pussaivlas en la participaziun politica. «Igl è impurtant che las persunas giuvnas possian contribuir a las debattas cun lur agen mund d'experientschas», declera Barbara Wülser, manadra dal Post da stab per l'egualitad da las schanzas.

Las collavuraturas ed ils collavuraturs da las medias èn envidads cordialmain d'observar la debatta il suentermezdi a partir da las 13.50. Las sesidas da las cumissiuns n'èn betg accessiblas. Ulteriuras infurmaziuns sut www.stagl.gr.ch/parlament.

Fotografia agiuntada:

©Olivia Aebli-Item

Infurmaziuns:

Responsabladad: Post da stab per l'egualitad da las schanzas