En il Grischun sco chantun turistic èn occurrenzas ina part impurtanta da la concepziun da la purschida. Durant la pandemia dal coronavirus han stuì vegnir annulladas differentas occurrenzas. Per segirar la diversitad da la purschida pon vegnir concedidas durant 2 onns contribuziuns spezialas per motivs dal coronavirus ad occurrenzas d'ina attracziun naziunala u internaziunala.

Per quest intent ha il Departament d'economia publica e fatgs socials (DES) adattà – per ina durada limitada – la directiva departamentala da promoziun concernent la concessiun da contribuziuns ad occurrenzas e mess en vigur quella per il 5. da november 2021. Sin basa da l'adattaziun da la directiva pon vegnir concedidas durant 2 onns contribuziuns spezialas per motivs dal coronavirus en il sectur da las occurrenzas.

Pertutgadas èn occurrenzas da sport e da cultura existentas periodicas cun in'attracziun naziunala u internaziunala. Ellas ston avair in preventiv d'almain 1 milliun francs ed in potenzial da passa 1000 visitadras e visitaders per di. Plinavant èn ellas vegnidas valitadas da la destinaziun turistica respectiva sco top-eveniment da la destinaziun e n'han betg pudì vegnir realisadas tranter il mars 2020 ed il settember 2021. Ils detagls da las premissas da promoziun èn cuntegnids en la directiva (punct 9). Dumondas da promoziun pon vegnir inoltradas a l'Uffizi per economia e turissem, avant che l'occurrenza vegn realisada la proxima giada.

Tras quai ch'il DES ha adattà la directiva da promoziun, vegn realisada l'incumbensa Wilhelm concernent la mitigiaziun da perditas pervia da l'annullaziun d'occurrenzas grondas e da congress. Quella era vegnida acceptada dal Cussegl grond en la sessiun da favrer 2021.

Agiunta:

Directiva da promoziun concernent la concessiun da contribuziuns ad occurrenzas

Infurmaziuns:

Responsabladad: Departament d'economia publica e fatgs socials