Durant l'emna da vaccinaziun sa concentrescha l'Uffizi da sanadad sin ina vasta purschida da cussegliaziun per eliminar las temas da la vaccinaziun cunter COVID-19. Medias e medis da chasa, centers da vaccinaziun, apotecas, ospitals e vischnancas mettan a disposiziun dals 8 fin ils 14 da november 2021 ina purschida da cussegliaziun e da vaccinaziun fitg extendida. Las cussegliaziuns da vaccinaziun tar las medias ed ils medis da chasa èn gratuitas il november. Ultra da quai èsi pussaivel da sa laschar cussegliar davart la vaccinaziun per telefon sur differentas hotlines medicalas.
Er la purschida per vaccinaziuns senza preannunzia vegn extendida fermamain per l'emna dals 8 fin ils 14 da november 2021. Tgi ch'è anc malsegira u malsegir areguard la vaccinaziun cunter COVID-19, po sa laschar cussegliar en moda cumplessiva d'ina persuna medicinala spezialisada ed ha suenter la pussaivladad da sa laschar vaccinar en in dals numerus lieus da vaccinaziun.
Ferm augment dals dumbers da cas
Dapi mez october 2021 datti en il chantun Grischun in ferm augment dals dumbers da cas. Quai mussan er ils resultats dals tests en las scolas ed en ils manaschis. Ils dumbers da cas han cuntanschì il medem nivel sco l'onn precedent al cumenzament da la segunda unda l'entschatta november 2020. Actualmain hai 610 cas isolads en tut il chantun. Il november 2020 na vegnivan dentant anc fatgs nagins tests en ils manaschis ed en las scolas ed i na deva anc betg ina vaccinaziun cunter COVID-19.
Ils gronds dumbers da cas procuran d'ina vart per ina immunisaziun da la populaziun. Da l'autra vart chaschuna quai ina grevezza sproporziunada per il sectur da sanadad che paja pia il pretsch da la derasaziun natirala da l'infecziun. Igl exista il privel ch'il provediment medicinal sin las staziuns intensivas arriva a ses cunfins, sch'ils dumbers da cas restan uschè auts durant las proximas emnas e chaschunan in augment dals cas grevs da COVID-19. Da quai èn pertutgadas er persunas che han autras malsognas che COVID-19, per exempel persunas che ston spustar lur operaziuns. Actualmain èn occupads 5 dals 16 letgs intensivs en il chantun cun pazientas e pazients da COVID-19. Las pazientas ed ils pazients da COVID-19 sin las staziuns intensivas han en media 55-60 onns e ston star là durant en media trais emnas.
Bain pon ins s'infectar cun COVID-19 malgrà la vaccinaziun. En la gronda part dals cas è il decurs da la malsogna dentant miaivel. L'Uffizi da sanadad recumonda perquai da profitar da la pussaivladad da sa laschar cussegliar davart la vaccinaziun. Sin la pagina d'internet dal chantun figureschan tut las purschidas. Actualmain èn vaccinads en il chantun 67,8 pertschient da la populaziun.
Ulteriuras infurmaziuns davart l'emna da vaccinaziun:
www.gr.ch/impfwoche
www.impfwoche.ch
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias)
Responsabladad: Uffizi da sanadad