L'Uffizi da sanadad dal Grischun tira in facit positiv suenter l'Emna naziunala da vaccinaziun: Medias e medis da chasa, centers da vaccinaziun, apotecas, ospitals e vischnancas han organisà passa 100 purschidas d'infurmaziun, da cussegliaziun e da vaccinaziun ed han pudì far 956 emprimas vaccinaziuns supplementaras. A partir dals 16 da november 2021 datti en cas d'ina cumprova positiva d'anticorpuls in certificat COVID che vala 90 dis. Il mument s'augmentan ils dumbers da cas puspè marcantamain.

Durant l'Emna naziunala da vaccinaziun èn las purschidas da cussegliaziun e vaccinaziun vegnidas amplifitgadas fermamain. Medias e medis da chasa, centers da vaccinaziun, apotecas, ospitals e vischnancas han organisà passa 100 purschidas d'infurmaziun, da cussegliaziun e da vaccinaziun ed uschia reducì las retegnientschas envers la vaccinaziun cunter corona.

L'Uffizi da sanadad tira ina bilantscha positiva: Durant l'Emna da vaccinaziun n'hai dà nagins incaps. Ultra da quai èn vegnidas fatgas 956 emprimas vaccinaziuns durant l'emna passada, dapli che durant l'emna avant.

Mintga vaccinaziun quinta
68 pertschient da las Grischunas e dals Grischuns han ussa survegnì almain ina vaccinaziun. En vista al grond augment dals dumbers da cas sco er a la surchargiada dals ospitals acuts e da las staziuns intensivas vegni vinavant cusseglià a las persunas betg vaccinadas, da far diever da las purschidas existentas d'infurmaziun e da cussegliaziun, da reflectar il niz e las ristgas d'ina vaccinaziun per sasez e per la publicitad e da sa laschar vaccinar sche pussaivel. Las experientschas fatgas enfin ussa sin l'entir mund mussan, che la ristga d'avair cumplicaziuns severas che pon manar a la mort è bler pli auta tar ina infecziun cun il coronavirus che la probabilitad d'avair effects secundars gravants pervia da la vaccinaziun cunter COVID-19.

Certificat COVID en cas d'anticorpuls
A partir dals 16 da november 2021 pon vegnir emess certificats COVID er per persunas che pon cumprovar cun in test d'anticorpuls positiv actual ch'ellas èn guaridas e ch'ellas disponan d'in dumber suffizient d'anticorpuls. Quest certificat vala 90 dis, dentant mo en Svizra.

La prelevaziun da sang per determinar ils anticorpuls po vegnir fatga en ina pratica da medi da chasa ubain en in'apoteca. L'analisa sco tala vegn fatga en in labor. La determinaziun d'anticorpuls custa e vegn cussegliada a persunas che supponan ch'ellas sajan vegnidas infectadas pli baud cun il coronavirus e che n'èn betg anc vaccinadas.

• Sch'il resultat dal test d'anticorpuls è positiv, emetta il labor in certificat COVID per 90 dis. Ina cumprova positiva d'anticorpuls signifitga, ch'ins è vegnì en contact cun il coronavirus pli baud e ch'ins ha sviluppà anticorpuls cunter il virus.
  Ina protecziun anc meglra cunter ina segunda infecziun po vegnir cuntanschida cun in'unica vaccinaziun cunter COVID. Cun ina tala po alura vegnir dumandà in certificat per persunas vaccinadas (che vala 365 dis).
  

• Sche la cumprova d'anticorpuls è negativa, n'èn ins betg immun cunter il coronavirus. Perquai è la ristga d'in decurs pli grev pli aut tar ina infecziun cun il coronavirus. En cas d'in test d'anticorpuls negativ vegn cussegliada ina vaccinaziun.
  

Sch'il test d'anticorpuls vegn fatg tranter ils 16 ed ils 30 da november 2021 e sche la vaccinaziun vegn fatga suenter fin il pli tard ils 5 da december 2021, vegnan ils custs per la determinaziun d'anticorpuls restituids a chaschun da la vaccinaziun.

Ina surchargiada dal provediment da sanadad maina ad ina triascha da pazientas e pazients
Il mument vegn registrà in augment marcant dals dumbers da cas. Cun in retard da var 14 dis vegn quest svilup a mussar in effect sin il dumber d'ospitalisaziuns ed anc ina giada var 14 dis pli tard sin l'occupaziun da las staziuns intensivas tras pazientas e pazients da COVID. Igl exista il privel, ch'il provediment medicinal sin las staziuns intensivas arriva a ses cunfins, sch'ils dumbers da cas restan uschè auts durant las proximas emnas e chaschunan in augment dals cas grevs da COVID. En quest cas stuessan vegnir fatgas triaschas tar il provediment da pazientas e pazients ed operaziuns stuessan vegnir spustadas. Da quai fissan pertutgadas er persunas che han autras malsognas che COVID, er per exempel persunas che ston spustar lur operaziuns.

L'Uffizi da sanadad dal Grischun appellescha perquai ina giada dapli a l'atgna responsabladad e cusseglia urgentamain da tegnair ina distanza minimala dad 1,5 meters, da sa proteger cun ina mascrina per la fatscha e da lavar regularmain ils mauns sco er d'evitar fullas da glieud.

Infurmaziuns:

Responsabladad: Uffizi da sanadad