En ina missiva al Cussegl grond mussa la Regenza, co ch'il chantun Grischun vul ir enturn ils proxims decennis cun la forza idraulica grischuna e co ch'el vul il medem mument crear dapli valur e rinforzar la segirezza dal provediment da la forza electrica per las generaziuns vegnintas. En questa missiva preschenta la Regenza ils accents strategics per il chantun areguard las renovaziuns da las concessiuns vegnintas, areguard il tractament da las participaziuns, areguard l'explotaziun da l'energia ord la participaziun ed areguard la gestiun dals implants idraulics.

Circa in tschintgavel da l'electricitad ord forza idraulica da la Svizra vegn producì en il Grischun. Da l'onn 2035 fin l'onn 2050 van a fin las concessiuns d'ina gronda part da las ovras idraulicas en il chantun Grischun. Questas ovras furneschan var 70 pertschient da la forza electrica che vegn producida en il chantun. Las vischnancas concessiunarias ed il chantun èn actualmain participadas cun var 20 pertschient al parc da las ovras electricas. Per gronda part appartegnan las ovras electricas a societads d'electricitad extrachantunalas. En il chantun Grischun è la creaziun da valurs grazia a la forza idraulica considerabla. La gronda part da questa creaziun da valurs resulta dentant ordaifer il Grischun.

Cun la Strategia chantunala concernent la forza idraulica persequitescha la Regenza la finamira, d'augmentar en il chantun Grischun la creaziun da valurs ch'è colliada cun la producziun d'electricitad ord forza idraulica ed uschia da realisar retgavs persistents. Il medem mument duai la strategia gidar ad augmentar la segirezza dal provediment d'electricitad en il chantun. Che las concessiuns existentas da las ovras idraulicas van a fin ils proxims onns e decennis è in bun punct da referiment per quest intent.

La forza idraulica daventa adina pli impurtanta
Tenor la Lescha davart il dretg da las auas vegn in'ovra idraulica suenter la scadenza da la concessiun transferida a la communitad che surdat la concessiun (return dals implants a la concedanta). Il chantun Grischun e las vischnancas da concessiun survegnan uschia in portfolio d'ovras electricas ch'è impurtant pertutgant la quantitad e pertutgant las finanzas. Er en il futur vegnan las ovras idraulicas a prestar ina contribuziun relevanta a favur da la producziun d'electricitad en Svizra. Questa contribuziun è e resta impurtanta per cuntanscher las finamiras da la politica d'energia e dal clima da la Confederaziun e dal chantun. D'ina vart, perquai che la producziun da forza idraulica confurma als basegns è ina pitga impurtanta da la segirezza dal provediment d'electricitad en il Grischun, en la Svizra ed en l'Europa. Pervia da la sortida da la Svizra ord l'energia nucleara e pervia da l'introducziun da novas tecnologias – per exempel er en il sectur dal traffic – vegn da l'autra vart il basegn d'electricitad ord energias regenerablas a s'augmentar en l'avegnir.

Empermischun a las generaziuns vegnintas
Las dumondas da renovar las concessiuns per implants idraulics ston vegnir inoltradas da las societads d'electricitad almain 15 onns avant la scadenza. Emprimas dumondas èn suttamessas u èn proximamain necessarias. La Regenza vul profitar da la situaziun da partenza en connex cun ils returns dals implants a la concedanta sco schanza, per rinforzar la forza idraulica ed – en l'interess dal Grischun – da la duvrar meglier sco resursa en l'avegnir. Cun la Strategia concernent la forza idraulica duai la forza idraulica vegnir francada anc meglier en il chantun. Il medem mument duai vegnir pussibilità a lunga vista al chantun ed a las vischnancas concessiunarias da valurisar meglier la resursa forza idraulica. Il chantun Grischun fa uschia in'empermischun a las generaziuns vegnintas. Oravant tut sche implants vegnan returnads a la concedanta, duai la strategia – durant ils proxims circa 30 onns – servir a las purtadras ed als purtaders da decisiun dal chantun sco basa decisiva. A las vischnancas da concessiun duai la strategia però er servir sco recumandaziun. Las tractativas davart il return dals implants a la concedanta, ch'il chantun ha fatg ultimamain ensemen cun las vischnancas concessiunarias, mussan ch'igl è mintgamai pussaivel da cuntanscher il profit pli grond pussaivel per tut las partidas involvidas – tras cooperar cun las vischnancas concessiunarias e tras tscherner in'opziun d'agir adattada.

Forza idraulica grischuna per la creaziun da valur dal Grischun
Sa basond sin scenaris pussaivels dal martgà vegn la Strategia chantunala concernent la forza idraulica a la conclusiun, ch'il chantun duai sa participar – en il rom dals returns dals implants a la concedanta vegnints – pli ferm che oz a la forza idraulica dal Grischun. En pli duai il chantun tgirar vinavant il model d'ovras partenarias tras ina cooperaziun optimada cun ils partenaris da la branscha. L'energia obtegnida ord las participaziuns duai vegnir tratga a niz pli fitg che fin ussa sin il martgà e tras ina u pliras societads cun sedia en il chantun Grischun. A pli lunga vista gida quai a reducir la dependenza dals retgavs ord ils tschains d'aua ed ord l'imposiziun da taglia da las ovras, la quala n'è anc adina betg sclerida.

En cas ch'il chantun e las vischnancas concessiunarias augmentan lur participaziuns a las ovras, vegni vitiers tar ina participaziun da maioritad, che las lavurs da modernisaziun e d'engrondiment dals implants idraulics pon vegnir coordinads en moda pli simpla sin territori chantunal e che las investiziuns pon vegnir fatgas en moda constanta durant il curs dal temp. Sche l'augment da las participaziuns dal maun public als implants electrics vegn collià cun talas investiziuns, maina quai supplementarmain ad effects considerabels per l'economia regiunala e publica resp. per l'occupaziun.

Augment da la segirezza dal provediment per la societad e per l'economia dal Grischun
Il provediment segir, pajabel e persistent da forza electrica è indispensabel per ina societad e per in'economia moderna. L'augment da la participaziun dal chantun a la forza idraulica grischuna pussibilitescha da prender per mauns cun cleras finamiras e cun ina resursa indigena las sfidas da la politica federala e chantunala da l'energia e dal clima. Ultra da quai pon las autas pretensiuns als basegns dal provediment sin il territori chantunal vegnir satisfatgas meglier, pli independentamain da terzs e cun dapli participaziun a la decisiun.

Ils proxims pass
Il Cussegl grond vegn a tractar la Strategia chantunala concernent la forza idraulica en il rom da la sessiun da favrer 2022. Latiers duai el fixar las finamiras per la realisaziun da la strategia en il rom da dumondas da princip.