La Regenza ha approvà la revisiun parziala da la planisaziun locala che la vischnanca da Tavau aveva concludì ils 13 da zercladur 2021. Cun questa revisiun da la planisaziun locala duain vegnir stgaffidas las premissas per che la fundaziun «Guggerbach» possia realisar in tract nov directamain sper il center da geriatria existent.
La chasa da persunas attempadas e da tgira Guggerbach è vegnida construida da la fundaziun «Guggerbach» durant ils onns 1980. La finamira è stada quella da metter a disposiziun in center da geriatria modern ed adattà als basegns da las abitantas e dals abitants cun la pussaivladad d'abitar en moda assistida. Pervia da l'augment da la dumonda è la purschida vegnida amplifitgada cuntinuadamain. En il fratemp èsi sa mussà che tschertas localitads na correspundan betg pli als basegns da las abitantas e dals abitants. Perquai ha la fundaziun acquistà l'onn 2018 la parcella vischina ch'è situada al sid dal center. La fundaziun ha l'intenziun da realisar las localitads mancantas sin la nova parcella. Tranter auter èn planisads locals per intents socials, d'occupaziun e d'inscunter sco er ina garascha sutterrana. Il tract nov duai vegnir integrà cumplettamain en il center existent, tant areguard il manaschi sco er areguard l'architectura. Tras ina colliaziun sur terra duai il tract nov vegnir collià cun il center da geriatria existent.

©Comet Fotoshopping, Dieter Enz, Weisslingen

A l'orticultura ARBES ha la Regenza garantì ina contribuziun chantunala da maximalmain 456 000 francs per dischlocar e per concepir da nov ils stabiliments da l'orticultura sin l'areal dals Servetschs psichiatrics dal Grischun (SPGR). Ils SPGR mainan in lavuratori protegì per persunas cun impediments sin l'areal da la Clinica Waldhaus a Cuira. Latiers tutga l'orticultura ARBES che porscha 33 plazzas da lavur protegidas. Ils stabiliments d'iert dals SPGR ston vegnir dischlocads, perquai che l'areal en il sectur da l'abitadi Cadonau a Cuira vegn concepì e construì da nov. Per pudair realisar quest project da construcziun, ston vegnir disfatgs e dischlocads per part er stabiliments che vegnan duvrads da l'orticultura ARBES.
En in emprim pass duain las serras da l'orticultura ARBES vegnir disfatgas e remplazzadas tras serras novas en dus novs lieus. Ina serra pli gronda e stgaudada cun ina surfatscha da basa da 500 meters quadrat vegn construida sin l'areal existent da l'orticultura. Sur l'edifizi G da la Clinica Waldhaus duai ultra da quai vegnir montà in tunnel da folia betg stgaudà cun ina surfatscha da basa da 170 meters quadrat. Per remplazzar la surfatscha cultivabla che croda davent vegnan utilisads en l'avegnir las pastgiras ed ils champs sur la Clinica Waldhaus, che vegnivan cultivads fin ussa dal Plantahof. Plinavant duai vegnir construì en il nov lieu in pavigliun che po vegnir duvrà d'ina vart sco deposit e da l'autra vart sco susta en cas da mal'aura. Ils custs totals dal project importan var 570 000 francs.

 

Per il project «Amplificaziun dal post spezialisà e d'intermediaziun per la lavur voluntara» da la fundaziun benevol Grischun ha la Regenza concedì ina contribuziun da tut en tut 200 000 francs or da la finanziaziun speziala da la lottaria naziunala.
Gia dapi 13 onns maina la fundaziun benevol Grischun in post spezialisà e d'intermediaziun per la lavur voluntara. Quest post coordinescha la lavur voluntara en il Grischun e duai ussa vegnir sviluppà vinavant per l'avegnir tenor ils basegns da la societad. La fundaziun s'engascha en tut ils secturs da la vita, sco sanadad, cultura, religiun e baselgia, sport, politica, economia, bainstar social ed ambient.

Suenter che la via da Haldenstein è vegnida renovada tranter la punt dal Rain a Haldenstein e la fin da la via chantunala, po il pais maximal permess vertent da 18 tonnas ussa vegnir auzà sin da nov 32 tonnas. Supplementarmain èn permess da nov camiuns cun chars annexs fin 10 tonnas.

Medemamain ha la Regenza approvà l'adattaziun da las valurs maximalas admessas per la via da Tràn. Suenter che la renovaziun dal traject tranter la baselgia refurmada e la fin da la via chantunala è terminada, po quest traject vegnir charrà da nov cun in pais maximal da 32 tonnas (fin ussa 18t) e cun ina ladezza maximala da 2,55 meters (fin ussa 2,3m). Las mesiras entran en vigur cun l'adattaziun da la signalisaziun correspundenta.

 
Foto 1: via da Tràn, Foto 2: via da Haldenstein