En la sessiun d'october 2021 ha il Cussegl grond concludì l'emprima etappa dal Green Deal. L'Uffizi d'energia e da traffic realisescha quests conclus a partir dal 1. da december 2021 cun conceder contribuziuns da promoziun pli autas per sanar edifizis sco er per remplazzar stgaudaments electrics, d'ieli e da gas.
Cun ses conclus da realisar il Green Deal pretenda il Cussegl grond ch'i vegnian prendidas cun gronda prioritad temporala mesiras per proteger il clima ed uschia per reducir l'emissiun da substanzas nuschaivlas. Ina gronda part dals 67 milliuns francs che vegnan mess a disposiziun per ils proxims 4 onns è previsa per midar da stgaudaments fossils a sistems da stgaudar regenerabels sco er per augmentar l'effizienza dals edifizis existents cun agid da mesiras d'isolaziun. L'Uffizi d'energia e da traffic (UEnTr) statuescha in exempel ed auza tut las contribuziuns da promoziun dals programs existents per in bonus. Quest bonus importa 100 pertschient per mesiras vi da la tecnica da chasa e 50 pertschient per mesiras vi da las paraids e vi dals mirs exteriurs dals edifizis. Per las proprietarias ed ils proprietaris da chasas s'augmenta uschia la motivaziun da renovar lur immobiglias e da duvrar energias regenerablas. Concretamain vul quai per exempel dir che la contribuziun chantunala per remplazzar il stgaudament d'ieli u da gas d'ina chasa d'ina famiglia tras in stgaudament cun pumpa a chalur e cun sondas geotermicas, vegn auzada dad actualmain 6250 francs a 12 500 francs. Sch'il tetg vegn suttamess ad ina sanaziun termica, s'augmenta la contribuziun dad actualmain 60 francs a 90 francs per meter quadrat.
Augment da las contribuziuns da promoziun planisà fin l'onn 2024
Ils augments vegnan disponids a partir dal 1. da december 2021 ed èn previs fin l'onn 2024. Il UEnTr è persvadì che questa mesira po prestar ina contribuziun a la reducziun dal CO2. Sco effect secundar positiv ord vista da l'economia publica resulta in volumen da sanaziun pli grond a favur da la mastergnanza grischuna. Tut las infurmaziuns davart ils programs da promoziun sa chattan sin la pagina d'internet da l'Uffizi d'energia e da traffic sut energie.gr.ch.
Infurmaziuns:
- Thomas Schmid, manader da l'Uffizi d'energia e da traffic, tel. +41 81 257 36 21, e‑mail Thomas.Schmid@aev.gr.ch
- Andrea Lötscher, manader da la partiziun Effizienza da l'energia, Uffizi d'energia e da traffic, tel. +41 81 257 36 30, e‑mail Andrea.Loetscher@aev.gr.ch
Responsabladad: Uffizi d'energia e da traffic