La Regenza ha prendì posiziun tar in project da consultaziun dal Departament federal per ambient, traffic, energia e communicaziun (DATEC) concernent la revisiun parziala planisada da l'Ordinaziun da radio e televisiun (ORTV). En vista al nov concessiunament dal service public regiunal a partir da l'onn 2025 duai questa revisiun actualisar ils intschess da provediment dals radios locals e da las televisiuns regiunalas. Ils intschess da provediment d'enfin ussa dateschan da l'onn 2007. Tenor il sboz da consultaziun duain interferenzas dals intschess da provediment vegnir evitadas, quai vul dir: per l'ina daventass la regiun Moesa da nov ina part fixa da l'intschess da provediment Svizra Sidorientala e crudass pia davent da l'intschess da provediment Sopraceneri, per l'autra vegniss la regiun da Sargans/Werdenberg attribuida a l'intschess da provediment Svizra Orientala e crudass pia davent da l'intschess da provediment Svizra Sidorientala.

Pervia dal referendum tar il pachet da medias, n'è la situaziun politica da partenza betg clera en tut ils puncts. Medemamain na resorti betg cleramain dals documents da consultaziun, tge consequenzas che la reducziun dals territoris da concessiun d'enfin ussa avess sin l'attribuziun da las parts da la taxa. Per las interpresas da medias vegnan il fatg numnà sco er la probabla diminuziun dals retgavs da reclama e da sponsuradi ad esser facturs da malsegirezza respectivamain ina mancanza da la segirezza da planisaziun. Tut en tut pleda quai il mument per desister d'ina revisiun e per prolungar empè da quai las concessiuns existentas senza midadas. Independentamain dal fatg, sch'i vegn cuntinuà cun il sboz da consultaziun u sche la revisiun vegn reprendida pli tard, accentuescha la Regenza che tschertas interferenzas dals territoris da concessiun en las regiuns da cunfin stoppian vegnir admessas er vinavant. Quai vala en spezial per la regiun Moesa e per la regiun da Sargans/Werdenberg.

En vista a las relaziuns linguistics e culturalas dal chantun Grischun propona la Regenza plinavant, che las cundiziuns specificas a favur da las minoritads linguisticas e che la collavuraziun cun las organisaziuns linguisticas restian francadas en l'ordinaziun sco tala er en il futur. Medemamain stoppia vegnir integrà explicitamain en l'ordinaziun che las emissiuns che vegnan furnidas per rumantsch e per talian stoppian er esser servetschs d'infurmaziun che sa refereschan a las particularitads politicas, economicas e culturalas dals territoris pertutgads.