Omicron sa derasa rasantamain e vala gia sco varianta dominanta dal coronavirus. L'Uffizi da sanadad appellescha perquai urgentamain da reducir tut ils contacts sin in minimum, da tegnair distanza e da purtar consequentamain la mascrina. Tenor las enconuschientschas actualas protegia la vaccinaziun da rinfrestgament cunter grevs decurs da la malsogna er tar la varianta Omicron.
Il Stab directiv chantunal e las persunas responsablas da l'Uffizi da sanadad han discutà glindesdi saira davart la situaziun actuala, quai en preschientscha dals cussegliers guvernativs Marcus Caduff, schef dal Departament d'economia publica e fatgs socials sco er Peter Peyer, schef dal Departament d'economia publica e fatgs socials.
Cun ina cumpart da passa 55 pertschient è Omicron gia la varianta dominanta en l'entira Svizra. Ella vala sco extremamain contagiusa. Tenor las enconuschientschas actualas è Omicron quatter fin sis giadas pli contagiusa che la varianta Delta d'enfin ussa. La derasaziun rasanta engrevgescha danovamain fermamain il sectur da sanadad, il turissem e l'economia.
La vaccinaziun da rinfrestgament protegia cunter grevs decurs
Ina guariziun u ina vaccinaziun porschan ina protecziun limitada cunter ina infecziun cun la varianta Omicron. Las experientschas actualas mussan dentant, che la vaccinaziun da rinfrestgament ha ina gronda efficacitad cunter grevs decurs er tar la varianta Omicron. Laschar rinfrestgar la vaccinaziun vegn cusseglià explicitamain a tut las persunas sur 16 onns, ch'èn dapi quatter mais vaccinadas cumplettamain.
Igl è indispensabel da tegnair distanza e purtar ina mascrina
Pervia da la situaziun fermamain tendida sin las staziuns intensivas appellescha l'Uffizi da sanadad d'observar consequentamain las mesiras da protecziun vertentas per pudair garantir il provediment da sanadad. En spezial valan illimitadamain las suandantas mesiras: Tegnair distanza, purtar ina mascrina, lavar fitg bain ils mauns, dar aria regularmain a locals interns. Gist tuttina impurtant èsi d'evitar contacts e da sa cuntegnair cun respect tar activitads da temp liber ed en il ravugl da la famiglia e d'amias ed amis. Durant las proximas emnas èsi mo pussaivel d'evitar mesiras pli rigurusas, sche tut las mesiras actualas vertentas vegnan realisadas e fatgas valair consequentamain. Quai pretenda ina gronda disciplina da la populaziun e dals giasts.
En vista a la midada da l'onn vegn cusseglià da passentar Son Silvester a chasa en in pitschen rom e privat.
Mesiras da protecziun consequentas tar occurrenzas grondas
Per occurrenzas grondas valan concepts da protecziun rigurus. Tar occurrenzas vegn applitgada consequentamain la regla da 2 G (vaccinà e guarì) cun l'obligatori da purtar ina mascrina e quai en tut ils locals interns. La mesira vala per tut las persunas sur 16 onns, tant per visitadras e visitaders, per il public sco er per persunas che lavuran e per gidantras e gidanters. Exceptads da questa regla èn mo atletas ed atlets che disponan d'ina Swiss Olympic Card ubain commembras e commembers d'in cader naziunal d'ina federaziun da sport. Ellas ed els pon prender giu la mascrina durant lur activitad sportiva, as ston dentant suttametter ad in reschim da testar sever. Ils organisaturs vegnan plinavant intimads da desister da puncts da program cun caracter da divertiment, che na fan betg exnum da basegn. L'Uffizi da sanadad vegn a controllar l'observaziun da las mesiras ed en cas da cuntravenziuns a retrair immediatamain la permissiun.
Las autoritads chantunalas giuditgeschan cuntinuadamain la situaziun e vegnan en cas da basegn a relaschar mesiras pli rigurusas per garantir il provediment da sanadad, la protecziun da la populaziun e per impedir consequenzas negativas per l'economia. Mo sche tuttas e tuts, l'entira populaziun grischuna ed ils giasts, observan senza limitaziuns tut las mesiras vertentas, vegni a reussir d'evitar cesuras gravantas da la vita publica las proximas emnas.
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias)
Responsabladad: Uffizi da sanadad