La vaccinaziun cunter COVID-19 vegn recumandada per uffants da 5 fin 11 onns, sche lur geniturs ubain lur persunas responsablas per l'educaziun giavischan quella, suenter ch'els han valità individualmain las ristgas ed il niz per lur uffant. La vaccinaziun vegn spezialmain recumandada per uffants che han gia in grond disturbi da la sanadad pervia d'ina malsogna cronica e/u sche persunas cun in sistem d'immunitad indeblì vivan en lur conturn. L'annunzia pon ins far online sur la pagina d'internet dal chantun.
Las vaccinaziuns d'uffants vegnan fatgas en ils centers da vaccinaziun regiunals sco er en intginas praticas da medis d'uffants. Per cussegliar e per assister èn durant las vaccinaziuns d'uffants medias e medis d'uffants diplomads al lieu. L'annunzia per la vaccinaziun d'uffants pon ins far online sur la pagina d'internet dal chantun. Ils emprims termins èn disponibels a partir da sonda, ils 8 da schaner 2022.
L'immunisaziun da basa cumpiglia duas vaccinaziuns cun il vaccin per uffants Comirnaty da Pfizer/BioNTech en in interval da 28 dis. Ina dosa singula dal vaccin correspunda ad in terz d'ina dosa per persunas creschidas (10 µg).
Recumandaziun da vaccinaziun en spezial per uffants cun grevezzas preliminaras
La vaccinaziun cunter COVID-19 vegn recumandada per uffants, sche lur geniturs u lur persunas responsablas per l'educaziun giavischan quella, suenter ch'els han valità individualmain las ristgas ed il niz per lur uffant. Questa recumandaziun vala spezialmain per uffants da 5 fin 11 onns che:
- han gia in grond disturbi da la sanadad pervia d'ina malsogna cronica, per evitar tant sco pussaivel mintga ulteriura infecziun/malsogna
- han stretgs contacts (en il medem dachasa) cun persunas che na pon per exempel betg proteger sasezzas bain avunda cun la vaccinaziun pervia d'ina defizienza d'immunitad. La vaccinaziun da quests uffants reducescha temporarmain la ristga d'infectar questas persunas vulnerablas.
Per uffants en la vegliadetgna da 5 fin 11 onns cun ina infecziun da corona confermada vegn ina singula dosa dal vaccin mo recumandada, sch'els tutgan tar las gruppas a) u b) numnadas survart. Tut ils ulteriurs uffants guarids na vegni actualmain betg recumandà da laschar vaccinar.
Tge èsi da prender cun sai per la vaccinaziun?
- Document d'identitad (carta d'identitad u passaport) da l'uffant sco er da la persuna responsabla per l'educaziun ch'accumpogna l'uffant
- Carta da la cassa da malsauns da l'uffant
- Conferma da l'emprima vaccinaziun per la segunda vaccinaziun (cumprova da vaccinaziun u certificat en furma da palpiri u app)
- Attest da vaccinaziun (en cas ch'ina registraziun vegn giavischada)
Nus faschain attent, ch'i vala als lieus da vaccinaziun – pervia da la situaziun epidemiologica – in obligatori da mascrinas per uffants a partir da 5 onns. Mascrinas per uffants vegnan messas a disposiziun al lieu.
Infurmaziuns:
Post da communicaziun per il coronavirus dal chantun Grischun, e‑mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias)
Responsabladad: Uffizi da sanadad