Il diever consequent da mascrinas è ina da las mesiras da protecziun las pli efficazias cunter transmissiuns. L'obligatori da mascrinas che vala dapi il cumenzament da december 2021 davent da la 3. classa fin e cun il stgalim superiur, vegn perquai prolungà fin ils 5 da mars 2022.

Las autoritads chantunalas partan dal fatg ch'ils dumbers da cas vegnian a s'augmentar vinavant durant las proximas emnas. Il diever consequent da mascrinas è perquai anc adina ina da las mesiras da protecziun las pli efficazias cunter transmissiuns. Perquai ha la Regenza decidì da prolungar fin ils 5 da mars 2022 l'obligatori da mascrinas che vala dapi ils 9 da december 2021. Pertutgadas da l'obligatori èn tut las persunas davent da la 3. classa primara fin e cun il stgalim secundar II (scolas professiunalas spezialisadas, centers da curs intermanaschials, lavuratoris d'emprendissadi, purschidas transitoricas, scolas medias sco er manaschis d'abitar e d'alimentaziun) ed al gimnasi inferiur. Grazia a l'obligatori da mascrinas en las scolas grischunas èsi pussaivel da cuntinuar cun l'instrucziun e da garantir la furmaziun a tut las scolaras ed ils scolars.

Exceptads da l'obligatori da mascrinas èn (sco fin ussa):

• scolaras e scolars dal 1. ciclus (scolina fin e cun 2. classa primara)
• situaziuns, nua che l'instrucziun vegniss engrevgiada considerablamain, sch'ins stuess purtar ina mascrina; en talas situaziuns sto però vegnir observada la distanza dad 1,5 meters u sto la protecziun vegnir garantida tras autras mesiras
• lecziuns en ils secturs da sport, da musica, da chant e da teater, sche la distanza dad 1,5 meters po vegnir observada
• sur lur atgnas medias e lur agens medis pon las instituziuns da la scolaziun speziala fixar – en cunvegnientscha cun la media chantunala resp. il medi chantunal – excepziuns motivadas da l'obligatori da mascrinas
• en ils manaschis da restauraziun da las instituziuns da furmaziun (p.ex. mensas, cantinas, cafetarias, manaschis d'abitar e d'alimentaziun) valan ils agens concepts da protecziun; per giasts externs valan supplementarmain las prescripziuns federalas e chantunalas per la gastronomia. Ils giasts na ston betg purtar ina mascrina, sch'els sesan vi d'ina maisa
• per persunas che pon cumprovar ch'ellas na pon betg purtar ina mascrina per motivs spezials, particularmain per motivs medicinals, ston vegnir prendidas autras mesiras da protecziun cunter infecziuns

La situaziun vegn giuditgada cuntinuadamain. Sche la situaziun sa meglierass avant ils 5 da mars 2022, vegnan las mesiras eventualmain adattadas.

Infurmaziuns:

Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias)

Responsabladad: Regenza