La Regenza ha approvà l'incumbensa da prestaziun «Streetwork Cuira» 2022 fin 2025 ed ha mess en vigur quella retroactivamain per il 1. da schaner 2022. Uschia extenda la Regenza la collavuraziun existenta cun l'Uniun per l'agid da survivenza dal Grischun. Cun questa incumbensa da prestaziun supplementara cumplettescha il chantun Grischun sia purschida multifara en il sectur da l'agid per persunas dependentas.

Streetwork stat per lavur sociala extra muros en il spazi public da la citad da Cuira e sa drizza en spezial a persunas pertutgadas da dependenza ed a persunas senza suttetg. Tras ina purschida da sustegn nunbirocratica duain las cundiziuns da viver da quellas persunas vegnir meglieradas. Collavuraturas e collavuraturs da Streetwork èn preschents en il spazi public, infurmeschan las persunas pertutgadas davart servetschs e purschidas da cussegliaziun e las faciliteschan l'access a tals. En situaziuns d'urgenza prestan ellas ed els ultra da quai agid immediat ed agid individual, per exempel en furma d'ina consegna da vestgadira u d'in tractament da plajas.

La cuntinuaziun da la lavur sociala extra muros a Cuira fa part da la purschida meglierada che la Regenza ha decidì en il sectur da l'agid per persunas dependentas. Durant la sessiun da december 2021 ha il Cussegl grond approvà ils meds finanzials correspundents en il preventiv.