La Regenza ha approvà il project d'exposiziun per la correcziun e per la sanaziun da canera da la via d'Engiadina tar la rundella Silvaplauna mitad, quai cun permissiuns spezialas. La rundella Silvaplauna mitad collia la via d'Engiadina e la via da Malögia e furma uschia l'axa da traffic la pli impurtanta da l'Engiadina. Ultra da l'access principal per il turissem nà da l'Italia, è questa colliaziun er fitg impurtanta per il transport da rauba en l'Engiadina e per cunfinarias e cunfinaris da l'Italia. La rundella è vegnida construida avant passa 25 onns sco nuf stradal provisoric ch'exista fin oz en questa furma e ch'è sa cumprovà en sia funcziun areguard la circulaziun dal traffic ed areguard la segirezza. En quai che concerna la tecnica na correspunda la concepziun provisorica da la rundella dentant betg pli a las pretensiuns actualas.

Il project cumpiglia in traject da via sin ina lunghezza totala da 280 meters. Previs èn ina construcziun nova da la rundella e la correcziun dals trajects da colliaziun. La concepziun da la rundella è percunter chaussa da la vischnanca e na fa betg part da quest project d'exposiziun. Per il sectur dal project è plinavant vegnì elavurà in project da sanaziun cunter canera. Sco mesira da sanaziun èsi planisà da remplazzar la cuvrida veglia da la via cun la cuvrida da standard che vegn normalmain duvrada en il chantun Grischun. Ils custs totals da quest project importan 3,52 milliuns francs. Cun resalva dal subvenziunament tras il chantun van 950 000 francs sin donn e cust da la vischnanca da Silvaplauna per construir las nischas da fermada per ils bus incl. passapes tenor ils basegns da las persunas cun impediments.

La Regenza ha approvà il project d'exposiziun per renovar la via dal Bernina a Poschiavo. Il traject dal project sa chatta entaifer il vitg da Poschiavo. La cuvrida da la via è en in nausch stadi e sto vegnir renovada. Ultra da quai na vegn betg ademplida la largezza minimala per ina via principala sin l'entir traject.

En il rom dal project duai perquai vegnir schlargiada la via sin sis meters. Plinavant duain vegnir meglieradas la charrabladad e la pussaivladad da cruschar per camiuns ed autos da posta e la segirezza da las pedunas e dals peduns duai vegnir augmentada. Ultra da quai èsi planisà da renovar la structura da la via, la cuvrida da la via sco er l'allontanament da l'aua da la via. Ils custs totals per il project da renovaziun importan var 880 000 francs.

Il project «Sistem da preavertiment Crap da Flem» è vegnì approvà da la Regenza. Ultra da quai ha ella deliberà ina contribuziun chantunala da maximalmain 60 000 francs per realisar quest project. Il sistem da preavertiment pussibilitescha da constatar a temp fitg grondas ed er pli pitschnas crudadas da grippa che pudessan periclitar Flem e Fidaz. Cun il sistem da surveglianza actual pon vegnir constatadas a temp mo fitg grondas crudadas da grippa che sa mussan gia dapi divers onns.

Il nov sistem da surveglianza sa cumpona da duas parts: d'ina vart da l'analisa currenta da la situaziun tras cussegliaders da privels da la natira (CLP) al lieu e da l'autra vart d'ina uschenumnada mesiraziun LiDAR sur l'entira surfatscha da la paraid dal Crap da Flem. La mesiraziun LiDAR è in scan da laser, cun il qual vegn elavurà in model digital dal territori. La mesiraziun vegn fatga mintga tschintg onns ord il helicopter. Ina installaziun fixa na dovri betg per quest sistem.

La Regenza ha approvà la revisiun parziala da la planisaziun locala che la vischnanca da Surses aveva concludì ils 30 d'avust 2021. Uschia stgaffescha ella las premissas per la realisaziun d'in center d'elavuraziun da laina per la firma Uffer SA a Tinizong. Il center d'elavuraziun da laina duai cumpigliar divers edifizis resp. stabiliments e gidar a garantir las resursas sco er a cumplettar la chadaina d'elavuraziun da laina. Gia oz vegni deponì ed elavurà laina sin ils bains immobigliars pertutgads da la zona da mastergn en vigur.