L'onn 1972 ha l'Uffizi da stimaziun cumenzà cun sia lavur. Quest onn festivescha el ses giubileum da 50 onns. Las incumbensas èn da princip restadas las medemas, la professiunalisaziun cuntinuescha dentant.
Gia il 19. tschientaner han ins fatg ponderaziuns davart la registraziun sistematica da las valurs da las immobiglias. Il motiv eran numerus incendis da vitgs, tar ils quals ils custs da construcziun stimads eran ina basa impurtanta per eventualas prestaziuns d'assicuranza. L'onn 1887 ha la Regenza incità in'emprima valitaziun da tut ils edifizis en il chantun. Quella n'ha dentant betg pudì vegnir duvrada sco basa per las premias d'assicuranza pervia d'inegualitads e pervia da mancanza da fidaivladad. Perquai è vegnida incumbensada in'ulteriura runda da valitaziun che n'è dentant betg vegnida terminada. L'onn 1912 ha l'Assicuranza d'edifizis avert sia gestiun. Ella ha surpiglià per part questas incumbensas.
Ils onns 1950 lavuravan 236 stimadras e stimaders en uffizi accessoric per l'assicuranza cunter fieu. I existivan 165 cumissiuns da stimaziun cun mintgamai dus fin trais commembras e commembers per las stimaziuns uffizialas. Supplementarmain èn vegnidas engaschadas ulteriuras 95 persunas per valitaziuns da taglia. Stimaziuns per guauds e proceduras da partiziun d'ierta vegnivan realisadas anc ina giada d'autras persunas. La finala eran engaschadas var 850 fin 900 persunas sco stimadras e stimaders en tut il chantun.
Fundaziun da l'Uffizi da stimaziun
Il cumenzament istoricamain difficil dals fatgs da valitaziun, las duplicitads apparentas, las enconuschientschas mancantas sco er la situaziun che anc betg tut ils edifizis n'eran valitads cumplettamain ils onns 1960, han manà a la fundaziun da l'Uffizi da stimaziun. Il fundament è vegnì mess dal commember dal Cussegl grond Peter Rechsteiner gia l'onn 1954 cun sia moziun concernent la «Unificaziun da las valitaziuns d'immobiglias per intents da taglia, d'assicuranza cunter fieu e d'emprest». Il Cussegl grond ha tractà la fatschenta tenor lavurs preliminaras voluminusas ils 3 d'october 1969. Per quest intent ha el er deliberà l'emprima Ordinaziun davart las stimaziuns uffizialas. L'Uffizi da stimaziun ha lura cumenzà il 1. da schaner 1972 cun sia lavur.
L'onn 1997, a chaschun dal giubileum da 25 onns da l'uffizi, lavuravan 37 collavuraturas e collavuraturs en uffizi cumplain, 60 stimadras e stimaders temporars sco er passa 800 stimadras e stimaders communals per l'uffizi.
L'actual Uffizi per la valitaziun d'immobiglias
L'onn 2018 ha gì lieu l'ultima revisiun da la lescha e cun quella ina midada da num ad Uffizi per la valitaziun d'immobiglias (UVI). Las incumbensas èn da princip restadas las medemas: la valitaziun regulara da tut ils bains immobigliars surbajegiads en il chantun Grischun. «La centralisaziun da la cumpetenza da cussegliaziun tar il UVI è sa cumprovada fitg bain, la determinaziun da tut las valurs da las immobiglias vegn fatga d'in maun», di il manader da l'uffizi Gion-Reto Hassler. Las collavuraturas ed ils collavuraturs lavuran principalmain en la valitaziun ed èn scolads bain. Las lavurs vegnan realisadas en in grad da digitalisaziun aut, cun il sustegn d'in program da valitaziun modern. Actualmain occupa l'uffizi var 60 collavuraturas e collavuraturs als lieus Cuira, Tavau, Glion, Samedan, Scuol e Tusaun. Il UVI sa chatta actualmain amez la tschintgavla stimaziun cumplessiva sistematica dals bains immobigliars surbajegiads. En quest connex vegni procedì vischnanca per vischnanca e valità annualmain var 18 000 fin 20 000 edifizis. Tar questas revisiuns na vegnan betg mo valitads objects d'abitar e da mastergn classics, mabain per exempel er manaschis agriculs, implants da transport ed ovras idraulicas.
Valitaziuns servan sco basa
Las valurs che vegnan disponidas a las proprietarias ed als proprietaris, servan d'ina vart per ina protecziun adequata tras l'assicuranza d'edifizis. Da l'autra vart furman las valurs da locaziun, las valurs dal retgav e las valurs commerzialas la basa per las autoritads chantunalas e communalas da taglia e pon er vegnir resguardadas sco basa per emprests en cas da bains immobigliars. Ulteriuras utilisadras ed ulteriurs utilisaders èn ils uffizis dal register funsil e las vischnancas. Els dovran las valitaziuns per ademplir lur incumbensas, sco per exempel l'incassament da taxas da colliaziun u da taxas sin abitaziuns secundaras.
Ultra da las valitaziuns da revisiun resultan valitaziuns er sin dumonda da las proprietarias ed ils proprietaris. Tar diversas dumondas vegnan er fatgas expertisas, per exempel per definir la taxa da plivalur tar enzonaziuns u per surdadas da manaschis agriculs.
Fotografias agiuntadas:
Collavuratur da l'Uffizi per la valitaziun d'immobiglias en acziun
Segunda illustraziun: Pagina 1 da l'emprima Ordinaziun davart las stimaziuns uffizialas dals 3 d'october 1969
Infurmaziuns:
Gion-Reto Hassler, manader da l'Uffizi per la valitaziun d'immobiglias, tel. +41 81 257 38 81, e-mail Gion-Reto.Hassler@aib.gr.ch
Responsabladad: Uffizi per la valitaziun d'immobiglias