Cumbain che la varianta dal coronavirus Omicron è fitg contagiusa, na vegn ella probablamain betg a manar il sistem da sanadad a ses cunfins. A questa conclusiun arriva in model che perscrutadras e perscrutaders dal Empa han fatg en collavuraziun cun spezialistas e spezialists da l'Universitad Philipps da Marburg e cun spezialistas e spezialists da las autoritads chantunalas. Tuttina sa mussan er ristgas: in ulteriur ferm augment dals dumbers d'infecziun na po betg mo tutgar la populaziun totala, mabain particularmain er il persunal spezialisà dals fatgs da sanadad.
Per giuditgar sch'igl è necessari da prender mesiras per franar la derasaziun da SARS-CoV-2, èn las capacitads dal sistem da sanadad in criteri decisiv. Concretamain vai per la dumonda, sche avunda persunas malsaunas pon vegnir recepidas e tractadas en ils ospitals. En la Gronda Britannia ed en auters pajais ch'èn vegnids confruntads cun la varianta Omicron gia l'atun, sa mussi dentant ch'ils dumbers da cas e las assegnaziuns en ils ospitals na stattan betg en correlaziun.
Scenaris epidemiologics
Per sclerir sch'i pudess dar quest svilup er en Svizra, han perscrutadras e perscrutaders da la partiziun «Multiscale Studies in Building Physics» dal Empa analisà ensemen cun spezialistas e spezialists da l'Institut per medischina da laboratori e per biochemia patologica da l'Universitad Philipps da Marburg sco er cun spezialistas e spezialists dal chantun Grischun e sviluppà scenaris cumplexs cun datas da la Svizra e da la Germania.
Ils scenaris mussan che la varianta Omicron na dastgass chaschunar naginas cifras da record en connex cun las recepziuns en las staziuns da tgira intensiva. Tuttina vegnan inditgadas er ristgas: las prognosas da las perscrutadras e dals perscrutaders dal Empa partan dal fatg ch'ils dumbers da cas vegnian a s'augmentar ulteriuramain durant las proximas emnas. L'ulteriur augment dals dumbers d'infecziun po tutgar – entaifer la populaziun totala – particularmain er il persunal spezialisà dals fatgs da sanadad. Quai po chaschunar stretgas da persunal e pia avair consequenzas per las capacitads che stattan a disposiziun en ils fatgs da sanadad.
Giudicament permanent da la situaziun
Las autoritads chantunalas prendan enconuschientscha dals scenaris dal Empa e vegnan ad integrar quels en lur giudicament permanent da la situaziun. Cun il concept da protecziun cumplessiv han ellas insumma gia sviluppà instruments per pudair reagir svelt al svilup da la situaziun. Uschia mussan las datas da sequenziament da provas d'aua persa e da provas dals tests en ils manaschis dal Grischun che la varianta Omicron ha pudì vegnir detectada gia il cumenzament da december 2021 e ch'ella è predominanta dapi la fin da december 2021.
Entant che la chargia da las staziuns da tgira intensiva stagnescha actualmain, è il dumber da novas infecziuns quotidianas tuttina sin in aut nivel. Las novas infecziuns han lieu en emprima lingia en las classas da vegliadetgna da 10 fin 49 onns.
Sche e tge mesiras actualas che pon eventualmain vegnir abolidas u adattadas, dependa da l'ulteriur svilup dals dumbers da cas. La Regenza giuditgescha cuntinuadamain da nov la situaziun.
Agiuntas:
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias)
Responsabladad: Stab directiv chantunal