Las basas da la Polizia da traffic da la Polizia chantunala dal Grischun a Cuira ed a Tusaun duain vegnir messas ensemen per motivs organisatorics e per motivs dal manaschi. Per quest intent duai dar – directamain tar l'access a la via naziunala A13 Cuira Sid – in edifizi nov exemplaric areguard la persistenza. La Regenza ha deliberà la missiva da construcziun correspundenta per mauns dal Cussegl grond.

La Polizia chantunala dal Grischun dispona oz da tut en tut sis basas da la Polizia da traffic (BPT) per lung da la A13 cun ils lieus San Bernardin, Tusaun e Cuira tar il commando da polizia sco er a Tavau, a Silvaplauna ed a Glion. Quellas BPT servan primarmain a la Polizia da regiuns per il dumogn d'engaschament nuninterrut durant l'entir onn en in manaschi da 24 uras. Cumplementarmain a questa incumbensa dal provediment da basa vegnan duvradas las BPT per il provediment spezial sin las vias naziunalas.

Concentraziun regiunala da basas da la Polizia da traffic
En il rom da la realisaziun da la strategia d'immobiglias dal chantun Grischun hai pudì vegnir tegnì quint ils ultims onns dal basegn polizial actual d'infrastructuras centralas cun stgaffir centers administrativs regiunals en il territori d'acziun Grischun Central a Tavau ed en il territori d'acziun Surselva a Glion. Cun metter a disposiziun in center da polizia en l'Engiadin'Ota che duai vegnir retratg il cumenzament da mars 2022, po vegnir terminada l'optimaziun da las infrastructuras cun basas da polizia modernas en las regiuns dal chantun. La BPT a San Bernardin è vegnida actualisada per la rampa dal nord e dal sid da la ruta dal San Bernardin cun il project da sanaziun ch'è en la fasa da terminaziun.

Unicamain il sectur nord dal provediment da la Polizia da traffic da Maiavilla fin a la Viamala n'ademplescha betg las pretensiuns actualas d'ina lavur optimala da la polizia. La gronda frequenza dals moviments dal traffic enturn Cuira ed il giavisch specific che la basa futura sa chattia en la vischinanza directa d'in access a l'autostrada pledan – areguard la situaziun locala – per il lieu previs tar l'access a la via naziunala A13 Cuira Sid. Cun fusiunar las BPT da Cuira e da Tusaun al nov lieu èsi plinavant pussaivel da concentrar meglier las forzas ed ils meds d'acziun da la Polizia chantunala en l'entira zona d'acziun.

Infrastructura orientada al futur
La BPT a Cuira Sid duai optimar il manaschi cun andaments curts ed effizients sco er cun metter a disposiziun ina infrastructura moderna che po vegnir duvrada en moda flexibla. Midadas futuras da la lavur da polizia èn pussaivlas entaifer la structura da l'edifizi ch'è adattabla. Il lieu cun access direct a l'autostrada è plinavant situà en moda ideala pertutgant la strategia da traffic, uschia che las forzas d'acziun responsablas pon ademplir effizientamain las incumbensas cun temps d'intervenziun curts.

Project exemplaric en il sectur da la construcziun persistenta
L'edifizi nov è vegnì lantschà sco project da pilot en il rom dal Plan d'acziun «Green Deal per il Grischun» e vegn realisà sco project exemplaric en il sectur dal construir en moda persistenta.

En quest project exemplaric vegn la persistenza chapida sco part integrala e colliada cun architectura d'auta qualitad. La consideraziun persistenta sa basa sin l'entir ciclus da vita da l'edifizi che cumpiglia la projectaziun, la construcziun, la gestiun e la restructuraziun. L'edifizi nov è caracterisà d'ideas innovativas per schanegiar las resursas, per reducir las grevezzas per l'ambient e per promover la biodiversitad. Ils aspects sco edifizi netto nulla per la construcziun e per la gestiun, abilitad da ciclus, microclima optimà, low-tech, suffizienza, producziun d'electricitad solara ed accumulaziun d'energia vegnan realisads en la construcziun.

Ils custs d'investiziun per il nov edifizi planisà importan tut en tut 9,8 milliuns francs. Sch'il Cussegl grond approvescha il project da construcziun ed il credit d'impegn, è la planisaziun d'execuziun previsa a partir da la stad 2022 e las lavurs da construcziun duain cumenzar l'entschatta da l'onn 2023. Igl è previs da metter en funcziun la nova BPT la stad 2024.

Il Cussegl grond vegn a tractar la missiva previsiblamain en la sessiun d'avrigl 2022.

Visualisaziun:

©Comamala Ismail Architects

Agiunta:

missiva

Infurmaziuns:

Cusseglier guvernativ dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01 (cuntanschibel da las 14.30 fin las 16.00), e‑mail Mario.Cavigelli@diem.gr.ch

Responsabladad: Regenza