Las dunnas èn anc adina sutrepreschentadas en la publicitad. Cun ina collecziun da bancas da datas d'expertas gida il Post da stab per l'egualitad da las schanzas a chattar la spezialista adattada, saja quai per gremis, per occurrenzas u per intervistas.

Savens èn ils umens quels che decleran il mund sin tribunas, ad occurrenzas, en la televisiun u en las gasettas. En 75 pertschient dals rapports da las medias èn ils umens ils protagonists. In sumegliant aspect han las discussiuns al podium u en la televisiun. Las dunnas èn sutrepreschentadas en la publicitad. Ina rapportaziun gista ed eguala tranter las dunnas ed ils umens è però centrala per las stentas d'egualitad. Pertge che la lingua e las medias influenzeschan fermamain noss pensar.

Savens hai num ch'ins na chattia nagina spezialista. En differentas branschas datti dentant senza auter in grond dumber d'expertas cumpetentas per preschentaziuns publicas e sco persunas che dattan infurmaziuns. Per che questas persunas vegnian chattadas èn vegnidas stgaffidas bancas da datas d'expertas en secturs sco la scienza, la tecnologia, la perscrutaziun u las medias. Questas bancas da datas gidan a renovar, a diversifitgar ed a render pli multifaras las perspectivas en las debattas publicas ed en la percepziun publica. Ina diversitad intellectuala e culturala è necessaria. In factur-clav per l'obtegnair è l'integraziun d'expertas femininas cun lur ideas innovativas che pon gidar a dumagnar las sfidas las pli differentas.

Tgi che tschertga, chatta
La pagina d'internet www.stagl.gr.ch/expertinnen-netzwerke cuntegna ina tscherna da bancas da datas d'expertas naziunalas ed internaziunalas. Il Post da stab per l'egualitad da las schanzas vul gidar uschia a collavuraturas e collavuraturs da las medias, ad organisaturas ed organisaturs da podiums e d'events ubain a persunas responsablas per seminaris e per lavuratoris, a chattar spezialistas adattadas. Da l'autra vart pon expertas mintgamai duvrar la banca da datas respectiva per publitgar lur profil e per sa metter a disposiziun per preschentaziuns publicas ubain sco persuna che dat infurmaziuns sco er per sa barattar cun autras dunnas da la medema branscha. La glista da las bancas da datas en la pagina d'internet vegn cumplettada cun ina collecziun da raits e da campagnas che rinforzan e sustegnan las dunnas en lur posiziuns.

Infurmaziuns:

Barbara Wülser, manadra dal Post da stab per l'egualitad da las schanzas, tel. +41 81 257 35 71, e-mail Barbara.Wuelser@stagl.gr.ch

Responsabladad: Post da stab per l'egualitad da las schanzas