Il cusseglier guvernativ Christian Rathgeb ha inaugurà oz – ensemen cun il president da la citad da Cuira Urs Marti e cun il secretari general da la Lia Rumantscha Diego Deplazes – l'exposiziun ambulanta «Rumantsch è…» en la Chasa municipala a Cuira. L'exposiziun sensibilisescha per il rumantsch, gida a colliar ed envida las visitadras ed ils visitaders da sezzas e sezs «semnar lingua». Ella po vegnir visitada fin il cumenzament da mars en la Chasa municipala, avant ch'ella viagia vinavant tras la Svizra.

Ina finamira impurtanta da l'exposiziun ambulanta è da far attent sin las Rumantschas ed ils Rumantschs che vivan ordaifer ils territoris da derasaziun tradiziunals da la lingua. Cuira è fitg impurtanta per la diaspora, perquai ch'en nagina autra citad svizra na vivan uschè bleras persunas da lingua rumantscha.

Inauguraziun en la Chasa municipala a Cuira
A l'inauguraziun ha il cusseglier guvernativ Christian Rathgeb engrazià a la citad da Cuira ed ha ditg: «Igl è grondius che l'exposiziun giastescha a Cuira e presta uschia ina contribuziun per sensibilisar e per colliar.» Il president da la citad Urs Marti ha agiuntà: «Cuira s'engascha intensivamain per la lingua e per la cultura rumantscha. Jau ma legrel perquai zunt fitg che l'exposiziun è da vesair en la Chasa municipala a Cuira.» Diego Deplazes, secretari general da la Lia rumantscha, ha punctuà: «Il rumantsch è preschent en tut la Svizra e duai perquai er vegnir vivì dapertut, sco cun questa exposiziun ambulanta.»

L'inauguraziun ha gì lieu en la Chasa municipala a Cuira. Suenter ils bainvegnis en la sala dal cussegl communal han ils giasts visità l'exposiziun. Causa il coronavirus ha l'occurrenza gì lieu en in pitschen rom.

Exposiziun ambulanta publica
L'exposiziun po vegnir visitada en la Chasa municipala a Cuira fin ils 2 da mars 2022 mintgamai da glindesdi fin venderdi da las 8.00 fin las 12.00 e da las 13.30 fin las 17.00 (entrada Poststrasse 33, foyer en il 1. plaun). Las visitadras ed ils visitaders vegnan supplitgads da resguardar las mesiras vertentas cunter il coronavirus.

Suenter il segiurn a Cuira viagia l'exposiziun a Lucerna ed en il decurs da l'onn en ulteriurs chantuns. Sut www.rumantsch-e.ch chattais Vus las indicaziuns davart ils lieus da l'exposiziun. L'exposiziun po vegnir contemplada là er online.

L'exposiziun ambulanta «Rumantsch è…» è in project dal chantun Grischun. Ella è vegnida creada en collavuraziun cun la Lia Rumantscha, cun la Promoziun da la cultura dal Grischun e cun la Conferenza da las regenzas chantunalas. Il mars 2021 aveva la Regenza concludì da realisar l'exposiziun cun ina contribuziun or da la finanziaziun speziala da la lottaria naziunala.

Fotografias agiuntadas:

Infurmaziuns:

• cusseglier guvernativ Christian Rathgeb, schef dal Departament da finanzas e vischnancas, president da la Conferenza da las regenzas chantunalas, tel. +41 81 257 32 01, e-mail Christian.Rathgeb@dfg.gr.ch
• president da la citad da Cuira Urs Marti, schef dal Departament da finanzas, economia e segirezza, tel. +41 81 254 41 00, e-mail Urs.Marti@chur.ch
• Diego Deplazes, secretari general Lia Rumantscha, tel. +41 81 258 32 22, e-mail Diego.Deplazes@rumantsch.ch

Responsabladad: Departament da finanzas e vischnancas