La Regenza ha prolungà la cunvegna da prestaziun cun il Center svizzer d'electronica e da microtecnologia SA (CSEM SA) ed ha concedì ina contribuziun chantunala da 3,7 milliuns francs per ils onns 2022 e 2023. Al CSEM SA vegn ultra da quai concedida ina contribuziun da maximalmain 300 000 francs en il rom da la Nova politica regiunala da la Confederaziun (NPR). La contribuziun NPR vegn pajada mintgamai per la mesadad da la Confederaziun e dal chantun.

Il center da perscrutaziun CSEM a Landquart gioga ina rolla impurtanta en il process d'innovaziun da las interpresas regiunalas da tecnologia e d'industria. El è s'etablì a Landquart dapi sia fundaziun l'onn 2007 ed è daventà in partenari essenzial per interpresas en la regiun. En il contact direct cun las interpresas eruescha il CSEM regularmain ils basegns regiunals specifics per las branschas e resumescha quests basegns en in portfolio da tecnologia. Il CSEM ha ina vasta attracziun ed augmenta pia la schanza che ulteriuras firmas d'auta tecnologia sa domicilieschian en la regiun. Quai gida er a rinforzar decisivamain l'attractivitad dal Grischun sco lieu economic.

©CSEM SA

La Regenza ha approvà il project d'exposiziun per la renovaziun da la Via taliana sin il traject tar la traversada dal Ri di Lant en il territori da Pian San Giacomo. En cas da malauras è quest traject vegnì cuvrì repetidamain cun glitta e cun glera en il passà. Cunzunt la stad 2008 è la via chantunala vegnida cuvrida dal tuttafatg suenter in ferm urizi ed è perquai stada serrada durant plirs dis.

En il rom dal project duai tranter auter vegnir renovà il Ponte Lant. Actualmain ha il passadi dal Ri di Lant sut la punt existenta in diameter da mo 2,5 meters. Gia en cas d'eveniments pli pitschens n'è la punt betg pli segira areguard aua gronda. Per meglierar la segirezza en cas d'aua gronda sin quest traject prevesa il project da spustar il vial en il sectur da la punt per circa 18 meters da l'aual giu sco er d'adattar il letg da l'aual en il sectur da la traversada. Tras la realisaziun dal project da construcziun vegn meglierada la protecziun cunter privels da la natira, tras quai che la capacitad idraulica da l'aual vegn augmentada en il sectur da la punt. Plinavant vegn optimada la geometria da la via. Tut en tut custa il project circa 2,9 milliuns francs.

 

La Regenza ha prendì enconuschientscha da la Strategia chantunala per la prevenziun ed il cumbat da violenza a chasa en il Grischun ed ha concludì da realisar il plan da mesiras.

Tras ils dus puncts centrals da svilup «Metter en pe il management chantunal da smanatschas (punct 2.4)» e «Prevenziun e cumbat da violenza envers dunnas e da violenza a chasa (punct 2.2)» dal program da la Regenza 2021–2024 survegn il Post da coordinaziun Violenza a chasa, ch'exista dapi l'onn 2014, incumbensas pli vastas. Per quest intent ha la Regenza concedì al post da coordinaziun resursas supplementaras da persunal da 50 pertschient d'ina plazza. Il post da coordinaziun è affilià a l'Uffizi chantunal dal servetsch social, che tutga da sia vart al Departament d'economia publica e fatgs socials.

Areguard il cuntegn s'orientescha la Strategia chantunala per la prevenziun ed il cumbat da violenza a chasa en il Grischun tenor ils champs d'acziun da la Convenziun d'Istanbul sco er tenor il plan strategic cunter violenza a chasa, ch'è vegnì deliberà da la Confederaziun e dals chantuns ils 30 d'avrigl 2021.

Strategia chantunala per la prevenziun ed il cumbat da violenza a chasa en il Grischun