La Surveglianza grischuna da las fundaziuns ha mess da nov in register electronic da las fundaziuns sin la pagina d'internet da l'Administraziun da finanzas. Persunas interessadas survegnan uschia in access pli facil a las fundaziuns respectivas.

Il sectur da las fundaziuns è fitg sviluppà en Svizra. La fin da l'onn 2020 eran registradas tut en tut 13 375 fundaziuns d'utilitad publica, 425 da quellas sut surveglianza grischuna. In indicatur per la dinamica en il sectur da las fundaziuns svizras è, che passa 60 pertschient da las fundaziuns d'utilitad publica en Svizra èn vegnidas stgaffidas durant ils ultims 30 onns. E tuttina n'è la gronda part da la populaziun strusch conscienta, che las fundaturas ed ils fundaturs respectivs han mess a disposiziun valurs da facultad considerablas per intents determinads.

Simpel e transparent
La Surveglianza grischuna da las fundaziuns facilitescha ussa l'access a las fundaziuns respectivas, quai cun in register electronic sin la pagina d'internet da l'Administraziun da finanzas. Uschia pon persunas interessadas tschertgar l'intent da la fundaziun giavischà – cun ina selecziun or da categorias tematicas ubain cun ina tschertga tenor chavazzins – e chattar facilmain las adressatas ed ils adressats da las singulas fundaziuns.

Facultad da fundaziuns da passa 3,5 milliardas francs
La Surveglianza grischuna da las fundaziuns è in'autoritad da surveglianza e da transfurmaziun per las uschenumnadas fundaziuns classicas (senza puras fundaziuns da famiglias u da baselgias) ch'èn d'attribuir tenor lur intent e lur territori d'activitad al chantun Grischun. Actualmain vegnan survegliadas 425 fundaziuns classicas cun in volumen da facultad da passa 3,5 milliardas francs. L'autoritad da surveglianza sto procurar che la facultad da la fundaziun vegnia utilisada tenor l'intent, en il senn da la voluntad da la fundatura u dal fundatur. En il rom da questa surveglianza vegn examinada l'entira activitad commerziala, l'organisaziun sco er l'investiziun da la facultad. Il champ d'incumbensas da l'autoritad da surveglianza cumpiglia plinavant er l'execuziun da las midadas da l'intent e da l'organisaziun, l'approvaziun da fusiuns u da transmissiuns da facultad e la finala er la liquidaziun e la schliaziun da fundaziuns.

Fundaziuns d'assistenza per il persunal, fundaziuns per investiziuns e fundaziuns da libra circulaziun cun sedia en il chantun Grischun èn suttamessas a la Surveglianza tenor la LPP e da las fundaziuns da la Svizra Orientala cun sedia a Son Gagl. Fundaziuns cun sedia en il Grischun che han in caracter naziunal u internaziunal (territori d'activitad) èn suttamessas a la Surveglianza federala da las fundaziuns cun sedia a Berna. Er la Surveglianza federala da las fundaziuns ha publitgà sin sia pagina d'internet in register da fundaziuns. Quel cuntegna tut las fundaziuns classicas ch'èn sut surveglianza federala, e las fundaziuns pon vegnir consultadas tenor il medem schema.

Infurmaziuns:

Gianmarco Crameri, manader da la Surveglianza da las fundaziuns, Administraziun da finanzas, tel. +41 81 257 26 34, e-mail Gianmarco.Crameri@five.gr.ch

Responsabladad: Administraziun da finanzas